အမှတ်စဉ်(၅၇) {ကုက္ကုစ္စ၊ ထိနနဲ့ မိဒ္ဓ၊ ဝိစိကိစ္ဆာ၊ စိတ်အညစ်အကြေး ၁၄-မျိုး}

ကုက္ကုစ္စ

နောက်တစ်ခုက ‘ကုက္ကုစ္စ’ ဆိုတာ ကောင်းတာတွေ မလုပ်မိလို့ နောင်တပူပန်တယ်၊ မကောင်းတာတွေ လုပ်မိလို့ စိတ်ပူပန်သောက ရောက်ရတယ်၊ လုပ်မိတာ မလုပ်မိတာနဲ့ ကိုယ်လုပ်တဲ့ လုပ်ငန်း မအောင်မြင်တာလို့ ၃-မျိုး ရှိတယ်နော်။

                   (၁) လုပ်မိတဲ့ မကောင်းမှု အတွက်လည်း ပူပန်စိတ်ဖြစ်တယ်၊
                   (၂) မလုပ်မိတဲ့ ကောင်းမှုကိုလည်း ပူပန်စိတ် ဖြစ်တယ်၊
                   (၃) ကိုယ်လုပ်ရဲ့သားနဲ့ မအောင်မြင်တဲ့ အပေါ်မှာလည်း ပူပန်စိတ် ဖြစ်တယ်လို့ ဟောဒီလို ကုက္ကုစ္စက သုံးမျိုး ရှိတယ်။

ပူပန်တယ် ဆိုကတည်းက သူက ဒေါသနဲ့ ယှဉ်တွဲလာတာ၊ ဝမ်းနည်းတဲ့ စိတ်နဲ့ တွဲလာတယ်၊ ဝမ်းနည်းတဲ့ ခံစားချက်နဲ့ တွဲလာတယ်၊ ဒါကြောင့် ဒေါသမူစိတ်မှာ ယှဉ်တယ်တဲ့၊ သို့သော် ဣဿာရယ်, မစ္ဆရိယရယ်, ကုက္ကုစ္စရယ် ဒီသုံးခုဟာ တစ်ခုနဲ့ တစ်ခု အာရုံပြုတာချင်း မတူကြသည့်အတွက်ကြောင့် တစ်ပြိုင်နက် ယှဉ်လို့မရဘူး၊ တစ်ပြိုင်နက် မဖြစ်ကြဘူးတဲ့။

ထိနနဲ့ မိဒ္ဓ

နောက်တစ်ခုက ဘာတုံးဆိုရင် ထိနနဲ့ မိဒ္ဓ၊ ‘ထိန’ ဆိုတာ စိတ္တဿ အကမ္မညတာ - စိတ်ရဲ့ စွမ်းဆောင်နိုင်မှု လျော့ကျသွားတာကို ထိနလို့ ခေါ်တယ်၊ ဥပမာ- တရားအားထုတ်နေမယ်၊ တရားအားထုတ်နေရင်းက ပျင်းစိတ် ဝင်လာယ်၊ ဆက်ပြီးတော့ မလုပ်ချင်ဘူး၊ အဲဒါ ထိန။

 ‘မိဒ္ဓ’ ဆိုတာ ကာယဿ အကမ္မညတာ - စေတသိက်အစု ရဲ့ စွမ်းဆောင်နိုင်မှု လျော့ကျသွားတာ၊ ကာယကို စေတသိက်အစုလို့ စာပေကျန်းဂန်မှာ ဆိုတယ်၊ သို့သော် မိဒ္ဓလွှမ်းမိုးလာပြီဆိုရင် ခေါင်းလေးတဆက်ဆက် ဖြစ်လာပြီ၊ ကာယဿ အကမ္မညတာမှာ ကာယအရ ဝေဒနာ, သညာ,  သင်္ခါရ လို့ဆိုတဲ့ စေတသိက် အစုလို့ ဓမ္မသင်္ဂဏီပါဠိတော်မှာ ဟောပါတယ်၊ သို့သော် ခေါင်းတဆက်ဆက် ဖြစ်လာတာကလည်း မိဒ္ဓရဲ့ စွမ်းဆောင်မှုကြောင့်ပဲ၊ မိဒ္ဓဝင်လာရင် ငိုက်လာတယ်ပေါ့၊ ငိုက်လာရုံတင် မကဘူး၊ လူကြားထဲမှာ ဟန်မလုပ်နိုင်တော့ဘူး။

ထိနမိဒ္ဓက တရာအားထုတ်တဲ့ အချိန်မှာ ပိုဝင်လာတက်တယ်၊ သူ့ကိုလည်း စိတ်ရဲ့ အညစ်အကြေးတဲ့၊ ဘာဖြစ်လို့တုံး ဆိုတော့ အသိဉာဏ် တောက်ပြောင်မှု မဖြစ်စေနိုင်လို့ပဲ၊ ထိနမိဒ္ဓဟာ စိတ်ကို လွှမ်းမိုးထားတဲ့ အညစ်အကြေး တစ်ခုပဲ။

ဝိစိကိစ္ဆာ

နောက်ဆုံး တစ်ခုကတော့ ‘ဝိစိကိစ္ဆာ’ လုိ့ ခေါ်တယ်၊ ဝိစိကိစ္ဆာဆိုတာ ယုံမှားသံသယဖြစ်ခြင်း၊ သံသယ ဖြစ်တယ်ဆိုတဲ့ နေရာမှာ အကန့်အသတ် ရှိတယ်၊ ဘုရားနဲ့၊ ပတ်သက်ပြီး သံသယဖြစ်တယ်၊ တရားနဲ့ ပတ်သက်ပြီး သံသယဖြစ်တယ်၊  “နှစ်ပေါင်း ၂၅၀၀- ဂေါတမဘုရားပွင့်တယ်ဆိုတာ ဟုတ်ရဲ့လား၊ ဒီတရားတွေ ဟောထားခဲ့တယ် ဘုရားဟောတယ် ဆိုတာရော ဘယ်သူ သိလဲ၊ ဟုတ်ရဲ့လား၊” သံသယတွေ ဖြစ်လာတယ် စသည်ဖြင့် ဒွိဟဖြစ်လာတယ်၊ ဒီသံသယ ဒွိဟတွေဟာ အကောင်းဘက်ကို ဦးဆောင်မသွားဘူးတဲ့၊  အဆိုးဘက်ကို ရောက်သွားစေနိုင်တယ်ပေါ့၊ ဒါကြောင့်မို့ ဝိစိကိစ္ဆာကလည်း စိတ်ရဲ့အညစ်အကြေးတစ်ခုပဲတဲ့၊ ဟုတ်သလား, မဟုတ်သလား တွေးနေတာနဲ့ သူက ဘာအကျိုးမှ မရလိုက်ဘူး။

ဝိစိကိစ္ဆာ ရှိသင့်တဲ့ နေရာတော့ ရှိနိုင်တယ်၊ ဘယ်လို နေရာတုံးဆိုရင် ဒါ မှန်လား၊ မမှန်လား၊ ဆင်ခြင်စဉ်းစားတဲ့ ဝိစိကိစ္ဆာ၊ ‘ပတိရူပက’ လို့ လယ်တီဆရာတော်ဘုရားကြီးက သုံးတယ်၊ ဝိစိကိစ္ဆာအတုတဲ့။

အရပ်ထဲမှာ ပြောတယ်၊ တစ်ခါတလေ ဝိစိကိစ္ဆာများတယ်ဆိုတာ အတွေးတွေ များတနေတာကို ပြောတာ၊ ဝိစိကိစ္ဆာဆိုတာ သံသယတွေ ရှိနေတာ၊ မဝေခွဲနိုင်တာ၊ ဟုတ်သလား, မဟုတ်ဘူးလား၊ ငါ တရားအားထုတ်နေတာ မှန်ရဲ့လား၊ မမှန်ဘူးလား ဆိုတဲ့ အတွေးတွေ ဝင်ပြီးတော့ မဆုံးဖြတ်နိုင်ဘဲနဲ့ တွေဝေနေတဲ့သဘောတွေ ဖြစ်နေတာကို ပြောတာနော်။

 စိတ်အညစ်အကြေး ၁၄-မျိုး

                  ပေါင်းလိုက်တဲ့အခါကျတော့ စိတ်ရဲ့ အညစ်အကြေးဟာ ၁၄-မျိုးတဲ့၊ ဒါ စိတ်ရဲ့ အညစ်အကြေးတွေ၊ ပြန်ပြီးတော့ ခြုံပြောရမယ်ဆိုရင် မောဟ, အဟိရိက, အနောတ္တပ္ပ, ဥဒ္ဓစ္စ အမှန်မသိတာရယ်၊  မရှက်တာရယ်၊ မကြောက်တာရယ်၊ ပျံ့လွင့်တာရယ် အဲဒီသဘောတွေက အကုသိုလ်စိတ် ဖြစ်တိုင်းအကုန်ပါတယ်၊ အကုသိုလ်စိတ် ၁၂-ခုလုံးနဲ့ ယှဉ်တွဲကြတယ်။

လောဘ, ဒိဋ္ဌိ, မာန လိုချင်တာရယ်, အမြင်မှားတာရယ်, ကိုယ့်အရည်အသွေး ပေါ်မှာ မာန်တက်တာရယ်၊ အဲဒီ သုံးခုက လောဘမူစိတ်မှာ ဖြစ်တယ်။

ဒေါသ, ဣဿာ, မစ္ဆရိယ, ကုက္ကုစ္စ စိတ်ဆိုးတာရယ်, မနာလိုတာရယ်, ဝန်တိုတာရယ်, နောင်တာပူပန်တာရယ်၊ အဲဒီ သဘော ၄-ခုကတော့ ဒေါသနဲ့ ယှဉ်တွဲပြီး ဖြစ်တက်တဲ့ သဘောတရားတွေပါတဲ့။

ထိန မိဒ္ဓ ဆိုတာကတော့ ပင်ကိုယ်အားဖြင့် မထက်သန်ဘဲ နုံ့နှေးတဲ့ လောဘနဲ့လည်း ယှဉ်တွဲတက်တယ်၊ ဒေါသနဲ့လည်း ယှဉ်တွဲတက်တယ်။

 ဝိစိကိစ္ဆာ ဆိုတာကျတော့  မောဟနဲ့ပဲ ယှဉ်တွဲတယ်၊ အားလုံး ဒီ သဘာဝတွေဟာ စိတ်ကို ညစ်ပေစေတက်လို့ စိတ်ရဲ့ အညစ်အကြေးတွေသာ ဖြစ်ပါတယ်၊ ထိုစိတ်ရဲ့  အညစ်အကြေးတွေ ပျောက်အောင် မြတ်စွာဘုရားက ပေးထားတဲ့ နည်းလမ်းအတိုင်း ကျင့်ကြံကြိုးကုတ် အားထုတ်ကြမယ်ဆိုရင် ဒီစိတ်ရဲ့ အညစ်အကြေးတွေဟာ လျှော်ဖွပ်ပစ်လို့ရတဲ့ အရာတွေချည်းပါပဲတဲ့။ လျှော်ဖွပ်ပစ်လိုက်ရင် ဖြူစင်တဲ့စိတ်ကို ရလာပါလိမ့်မယ်တဲ့။

ဒါကြောင့်မို့ ဒီကနေ့ စိတ်ရဲ့ အညစ်အကြေးတွေကို အကျဉ်းချုပ်ပြီးတော့ သိသာအောင် ပြောပြီးပြီ၊ နက်ဖြန်ခါကျတော့ ဒီ အညစ်အကြေးတွေကို ဘာနဲ့ လျှော်မဆိုတာ ရှင်းပြမယ်၊ အဲဒီ လျှော်ရမယ့် အရည်အသွေးလေးတွေ စိတ်ထဲမှာ ရှိတယ်၊ အဲဒါတွေကို ထူထောင်ပြီး လျှော်ရမှာ ဖြစ်တယ်တဲ့။

ဒီကနေ့ ဗုဒ္ဓမြတ်စွာရဲ့ အဘိဓမ္မာဒေသနာမှာပါတဲ့ စိတ်ရဲ့ အညစ်အကြေးများ ဖြစ်တဲ့ အကုသိုလ်စေတသိက် ၁၄-ခုကို လေ့လာသိရှိကြိလို့ “မိမိရဲ့သန္တာန်မှာ ဒီလို အညစ်အကြေးတွေ မဖြစ်ရလေအောင် သတိထားပြီးတော့ ရှောင်ကြဉ်ကြဖို့၊ ဖြစ်ပေါ်လာပြီ ဆိုလည်း သန့်ရှင်း စင်ကြယ်သွားအောင် လုပ်ရန် မမေ့ဖို့” အရေးကြီးတယ်နော်။

မြတ်စွာဘုရားက ထိုထိုသုတ္တန်တွေမှာလည်း “အကုသိုလ်တွေကို မိမိစိတ်မှာ မဖြစ်စေနဲ့၊ စိတ်ကို မညစ်နွမ်းစေနဲ့” လို့ ဒီလို ဟောခဲ့တာ ဖြစ်ပါတယ်၊ ရေကြောင့်ဖြစ်တဲ့ ရွှံနွံကို ရေနဲ့ပဲ ပြန်ဆေးရသလို စိတ်မှာဖြစ်တဲ့ အညစ်အကြေးတွေကို လည်း စိတ်နဲ့ပဲ ပြန်ပြီးကြောလို့ ရပါတယ်တဲ့၊ ဆေးကြောလို့ ရနိုင်တဲ့ သဘာဝတရားများကို လေ့လာခြင်းဖြင့် အညစ်အကြေးများကို ကိုယ်စီကိုယ်စီ ဆေးကြောနိုင် ကြပါစေကုန်သတည်း။

“သာဓု - သာဓု - သာဓု”

** ဆက်ရန် **  အခန်း (၇) စိတ်ဖြူစင်မှု အင်အားစုများ  အပိုင်း(၁) မှ{သောဘဏစေတသိက်၊ သဒ္ဓါ}

*ကောက်နှုတ်ချက်* အဂ္ဂမဟာပဏ္ဍိတ အရှင်နန္ဒမာလာဘိဝံသ (Ph.D)
အဘိဓမ္မာ မြတ်ဒေသနာ (ပထမတွဲ) (စာ၂၉၁-၂၉၄)  မှ ကောက်နှုတ်ရေးသား ပူဇော်ပါသည်။

တင်ပြသူ Yanan Sanein အချိန် 9:34 AM