အာရုံ(၆)ပါး
ဒီနေရာမှာ အာရုံ(၆)ပါးဆိုတာ မှတ်ရမယ်၊ ခုနက စိတ်ရဲ့ အခြေခံ ‘base’ တွေက ၀တ္ထုရုပ်(၆)ခု၊ အဲဒီ ၀တ္ထုရုပ်(၆)ခု၊ အဲဒီ ၀တ္ထုရုပ်(၆)ခုဟာ အခြေခံ၊ အဲဒီအခြေခံကို လာပြီးတိုက်မယ့် အကြောင်းတရားကို ‘အာရုံ’ လို့ခေါ်တယ်၊ စိတ်ရဲ့ ပျော်မွေ့ဖွယ်ရာဖြစ်လို့ အာရုံလို့ ခေါ်တာ၊ ဖြစ်လိုက်တာနဲ့ တစ်ပြိုင်နက် စိတ်က ဘယ်ကို သွားတာလဲဆိုတော့ အဲဒီ အာရုံဆီရောက်သွားတာနော်။
အဲဒီအာရုံကို စာပေလိုပြောရင် (၁) ရူပါရုံ၊ ဗမာလူမျိုးတေဆွဟာ ဗုဒ္ဓရဲ့ အဘိဓမ္မာဝေါဟာရတွေနဲ့ ရင်းနှီးပြီးသားပါ၊ ရူပါရုံဆိုတာ မျက်စိက မြင်ရတဲ့အဆင်းကို ခေါ်တယ်၊ ရူပဆိုတာ အဆင်း၊ အာရမ္မဏဆိုတာ စိတ်ရဲ့ ပျော်မွေ့ရာ၊ ဒီ(၂)ခု ပေါင်းစပ်ပြီးတော့ အာရမ္မဏ ဆိုတဲ့ စကားလုံးကို အာရုံလို့ ပြန်လိုက်တော့ ရူပါရုံ။
(၂) သဒ္ဒါရုံ တဲ့၊ အသံသည်ပင်လျှင်စိတ်ရဲ့ပျော်မွေ့ရာ ဖြစ်လို့ သဒ္ဒါရုံ၊ စိတ်ရဲ့ပျော်မွေ့ရာဆိုလို့ ဟိုလို ဒီလို မတွေးလိုက်နဲ့ဦးနော်၊ ဆူညံတဲ့အသံနဲ့ စိတ်က မပျော်ဘူး၊ ဟုတ်ရဲလား၊ ဂီတသံနဲ့တော့ ပျော်တာပေါ့၊ အဲဒီလို ပျော်တာမျိုးကို ပြေတာ မဟုတ်ဘူး၊ ဒီစိတ်ဟာ အာရုံနဲ့ ကင်းပြီးမဖြစ်တော့ အာရုံ ပေါ်လာတာနဲ့ တစ်ပြိုင်နက် စိတ်က အာရုံဆီ ရောက်သွားတာကို ပြောတာ၊ တောက ကလေးတွေ ဗေထိ ဗေထိဆိုရင် ရောက်လာကြတယ်၊ သီချင်းသံကြားရင် ပြေးလာကြတယ်၊ အဲဒါမျိုးလိုပေါ့၊ စိတ်ကလည်းပဲ အာရုံရှိရာကို ရောက်ရောက်သွားတာကို ဒီလို ဆိုတယ်နော်။
ကဲ - နော်တစ်ခုက (၃) ဂန္ဓာရုံ - အနံ့သည်ပင်လျှင် စိတ်ရဲ့ ပျော်မွေ့ဖွယ်ရာ ဖြစ်လို့ ဂန္ဓာရုံ။
နောက် (၄) ရသာရုံ - လျှာနဲ့သိရတဲ့ အရသာ၊ ချိုတယ်၊ ချဉ်တယ်၊ ငန်တယ်၊ စပ်တယ်၊ ခါးတယ်ဆိုတဲ့ အရသာဟာလည်း စိတ်ရဲ့ ပျော်မွေ့ဖွယ်ရာဖြစ်သောကြောင့် ရသာရုံ။
(၅) ဖောဋ္ဌဗ္ဗာရုံ - ဖောဋ္ဌဗ္ဗဆိုတာ ခန္ဓာကိုနဲ့ ထိတွေ့ရလို့ အာရုံမျိုးကို ပြောတာ၊ ရူပါရုံဆိုတာ ခုနက
ရုပ်(၈)ခုထဲပါတဲ့ အဆင်းကလေး၊ သဒ္ဒါရုံဆိုတာ အကြောင်းကြောင့် ပေါ်လာတဲ့အသံကလေး၊ ဂန္ဓာရုံဆိုတာ ရုပ်(၈)ခု အစုထဲမှာ ပါနေတဲ့ အရသာကလေး၊ ဖောဋ္ဌဗ္ဗာဆိုတာ ဘယ်တရားကို ပြောတာတုန်းဆိုရင် ပထ၀ီရယ်၊ တေဇောရယ်၊ ၀ါယောရယ် အဲဒီ (၃)ခုကို ပြောတာနော်။
ကြည့်လေ၊ တစ်ခုခုကို စမ်းကြည့်လိုက်မယ်ဆိုရင် ဥပမာ ထမင်းချက်တဲ့အခါ လက်ကလေးနဲ့ စမ်းကြည့်၊ ယခုခေတ်တော့ Rice Cooker တွေ ဘာတွေနဲ့ချက်တော့ စမ်းချင်မှ စမ်းကြမှာ၊ ရှေးတုန်းကတော့ ထမင်း ကျက်,မကျက်ကို ယောက်မလေးနဲ့ ကော်ပြီးစမ်းရတယ်၊ စမ်းပြီးတော့ မှ ငှဲ့ပစ်ရတာ။
ရှေးတုန်းက အမျိုးသမီးတွေဆိုတာ တော်တော်များများက မိုးဖိုချောင်ထဲမှာ ထမင်းချက်ရတာ၊ ထမင်းချက်ရတဲ့အခါကျတော့ ဘာလုပ်ကြရတုန်းဆို ထမင်းချက်တဲ့အခါ ထမင်းနပ်, မနပ်ကို လက်ကလေး နှစ်ချောင်းနဲ့ စမ်းကြည့်ရတဲ့အလေ့အထ ရှိခဲ့တယ်။
တစ်ခါတုန်းက ဘိက္ခုနီမတစ်ယောက် တောထဲမှာ တရားနဲ့ နေတ့အခါ မာရ်နတ်က “ဒီလောက် လေးနက်တဲ့တရားကို နင်လို လက်နှစ်ချောင်း ပညာလေးနဲ့ သိနိုင်ပါ့လား” လို့ ပြောတာ။ ဒီလို လက်နှစ်ချောင်း ပညာလေးနဲ့ မသိနိုင်ဘူးလို့ မာရ်နတ်ကြီးက နှိမ်ပြောတာ။ “န တံ ဒွင်္ဂုလပညာယ” တဲ့၊
လက်နှစ်ချောင်း ပညာဆိုတာ ထမင်းချက်တဲ့အခါ လက်နှစ်ချောင်းလေးနဲ့ စမ်းပြီးတော့မှ သိတဲ့အသိကလေးနဲ့ ဒီလို ထူးခြား နက်နဲတဲ့ တရားတွေကို သိနိုင်ပါ့မလားလို့ မာရ်နတ်ကြီးက နှိမ်ပြီးပြောတဲ့ စကားပဲ၊ အဲဒီတော့ ဘိက္ခုနီကလည်း ဘယ်ခံမလဲ၊ “အင်မတန်ထူးခြားတဲ့ တရားတွေကို ငါသိပြီးပြီ” လို့ ပြောလိုက်တယ်၊ ဘိက္ခုနီသံယုတ် ထဲမှာ ဒီအကြောင်းလေးတွေ ပါတယ်၊ စိတ်ဝင်စားစရာ အလွန်ကောင်းတယ်။
အဲဒီမှာ ပြောချင်တဲ့အရာက ဘာလဲဆိုတော့ ထမင်းစေ့လေး နပ်,မနပ် စမ်းတဲ့အခါ ပျော့သလား မာသလား စမ်းတာ မဟုတ်လား၊ ပျော့သလား မာသလား စမ်းလို့ရှိရင် ပထ၀ီကို တွေ့တာပဲ၊ ပထ၀ီရဲ့သဘောကို စမ်းတာပဲ၊ အဲဒီလို မဟုတ်ဘဲနဲ့ ပူသလား၊ အေးသလား စမ်းတဲ့အခါကျတော့ အပူအအေးကို တွေ့တာပေါ့၊ တွန်းကန်နေတဲ့သဘောကို အာရုံပြုတဲ့အခါကျတော့ ၀ါယောကို တွေ့တာပေါ့၊ ဘောလုံးလေးကို စမ်းတဲ့အခါမှာ တွန်းကန်တဲ့ သဘောလေးတွေ့ရင် ၀ါယောကို တွေ့တာပေါ့။
အဲဒီတော့ ဖောဋ္ဌဗ္ဗာရုံလို့ဆိုတာဟာ ပထ၀ီရယ်၊ တေဇောရယ်၊ ၀ါယောရယ် ဒါကိုပဲခေါ်တာ၊ ဒါပေမယ့် (၃)မျိုးလုံးကို တစ်ခါတည်း သိနိုင်သလားဆိုတော့ မသိဘူး၊ ကိုယ်သိချင်တဲ့ အာရုံတစ်ခုပဲ အာရုံပြုတယ်၊ ဒါကြောင့်မို့ ပျော့သလား မာသလားဆိုရင် ပျော့တာ မာတာပဲ သိမယ်၊ ပူသလား အေးသလား ဆိုရင် ပူတာ အေးတာပဲ သိမယ်၊ တင်းသလား လျော့သလား လို့ ကြည့်မယ်ဆိုရင် ခုနက ၀ါယောပဲ သိမယ်၊ အဲဒါကြောင့်မို့ ဖောဋ္ဌဗ္ဗာရုံဆိုတာ တခြားဟာကို ခေါ်တာ မဟုတ်ဘူး၊ ပထ၀ီ၊ တေဇော၊ ၀ါယော၊ ဒီ မဟာဘုတ် (၃)ပါးတို့ကိုသာ ခေါ်တာ။
အာပေါဆိုတာကတော့ ဖောဋ္ဌဗ္ဗာရုံ မဟုတ်သည့်အတွက်ကြောင့် ထိတွေ့ပြီး စမ်းသပ်လို့ မရဘူး၊ ဒါဖြင့် တပည့်တော်တို့ နေ့စဉ် ရေကိုင်နေကြတာဘုရား၊ ရေကိုင်နေတာပဲ ထိလို့ တွေ့လို့ မရဘူးလားလို့ တွေးမိကောင်း တွေးမိကြလိမ့်မယ်နော်၊ အေး ရေထိတဲ့အခါကျတော့ ဘာသတိပြုမိတုန်း ရေ အေး သလား ရေပူသလား၊ အေးတယ် ပူတယ်ဆိုတာ အာပေါ ဟုတ်ရဲ့လား၊ မဟုတ်ဘူး၊ တေဇောကိုပဲ တွေ့နေတာ၊ ရေတွေ့တာ မဟုတ်ဘူး။
ဒါဖြင့် ရေကို ဗြန်းကနဲ ချလိုက်တဲ့အခါကျတော့ ရေရဲ့ တုန့်ပြန်မှုနဲ့ ပျော့တဲ့သဘော၊ မာတဲ့သဘော မတွေ့ဘူးလား၊ အဲဒါဆို ပထ၀ီကို တွေ့တာပဲ၊ အာပေါကို တွေ့တာ မဟုတ်ဘူးတဲ့၊ နောက် ရေရဲ့ လှုပ်ရှား တွန်းကန်မှုတွေကို တွေ့တဲ့အခါ ၀ါယောကို တွေ့တာ၊ အာပေါကိုတွေ့တာ မဟုတ်ဘူးတဲ့၊ ရေဆိုတာဟာ လက်နဲ့စမ်းလို့ရတဲ့ အရာမဟုတ်ဘူး၊ ဒီလက်နဲ့ စမ်းလို့ရနေတဲ့အရာက ခုန ပထ၀ီကိုပဲ စမ်းလို့ရမယ်၊ တေဇောကိုပဲ စမ်းလို့ ရမယ်၊ ၀ါယောကိုပဲ စမ်းလို့ရမယ်။
အဲဒီတော့ အာပေါဆိုတာက အရည်ပျော်နေတဲ့ သဘောပဲ၊ အဲဒါကို စိတ်နဲ့ပဲ သိလို့ရမယ်လို့ ပြောတယ်၊ ဒါကြောင့်မို့ ဒီအာပေါဆိုတာ ဖောဋ္ဌဗ္ဗရုံထဲမှာ မပါဘူးလို့ ပြောတာ၊ ရေ သောက်တဲ့အခါ ရေအေးအေးလေး သောက်ချင်တယ်တို့ ရေ ပူပူလေး သောက်ချင်တယ်တို့ ဆိုတာဟာ တေဇောကိုပဲ လုပ်နေတာ၊ အရည်ဖြစ်နေတဲ့သဘော အာပေါကို ထိလို့ တွေ့လို့ မရဘူး။
ကောင်းပြီ၊ ရူပါရုံ၊ သဒ္ဒါရုံ၊ ဂန္ဓာရုံ၊ ရသာရုံ၊ ဖောဋ္ဌဗ္ဗာရုံ၊ ဒါတွေဟာ ရုပ်တရားတွေချည်းပဲ မဟုတ်လား၊ ရူပါရုံ၊ သဒ္ဒါရုံ၊ ဂန္ဓာရုံ၊ ရသာရုံ၊ ဖောဋ္ဌဗ္ဗာရုံမှတစ်ပါး အားလုံးစိတ်နှင့် သိလို့ ရတဲ့ အာရုံတွေမှန်သမျှ နိဗ္ဗာန်နဲ့ အမည်ပညတ်တွေ အပါအ၀င်၊ စိတ်တွေ၊ စေတသိက်တွေ အပါဝင်ပေါ့၊ စိတ်ကိုလည်း စိတ်နဲ့ သိရတယ်၊ စေတသိက်ကိုလည်း စိတ်နဲ့ သိလို့ရတယ်၊ နာမ်တရားတွေကိုလည်း တခြားနာမ်တရားနဲ့ သိလို့ရတယ်၊ အဲဒီလို သိလို့ရတဲ့ အာရုံဖြစ်တာတွေ အကုန်ပေါင်းပြီးတော့ ဓမ္မာရုံ လို့ ခေါ်တာ။
ဒါဖြင့် ဒီ ကံမြင့်ဓမ္မာရုံကျတော့ ဘာကြောင့် ခေါ်တာလဲ၊ ဒါကတော့ တရားဓမ္မကို အာရုံယူတဲ့နေရာဖြစ်လို့ ဓမ္မာရုံလို့ ခေါ်တာ၊ အာရုံ(၆)ပါးထဲမှာ ပါတဲ့ ဓမ္မာရုံဆိုတာက စိတ်နဲ့ သိလို့ရတဲ့ တခြားအာရုံတွေလို့ ပြောတာ။
စိတ်နဲ့သိလို့ရတာ၊ ရူပါရုံဆိုတာ မြင်သိစိတ်နဲ့ပဲ သိလို့ရတယ်၊ သဒ္ဒါရုံဆိုတာ ကြားသိစိတ်နဲ့ပဲ သိလို့ရတယ်၊ ကြားသိစိတ် အခြေခံပြီး သိတယ်ပေါ့နော်၊ ကြားသိစိတ်က အဓိက သိတယ်၊ ထို့အတူပဲ ဂန္ဓာရုံကို နံသိစိတ်နဲ့၊ ရသာရုံကို လျက်သိစိတ်နဲ့၊ ဖောဋ္ဌဗ္ဗာရုံကို ထိသိစိတ်နဲ့ အဲဒါတွေ အခြေခံပြီးတော့ ကျန်တဲ့အာရုံတွေကျတော့ ဓမ္မာရုံ။
တခြားစိတ်နဲ့ သိလို့ရတဲ့ အာရုံတွေ၊ အတွေးတွေမှာ ပေါ်လာတဲ့အာရုံတွေ မှန်သမျှကို အကုန် ဓမ္မာရုံလို့ ဒီလို ခေါ်တာ၊ ရုပ်အားလုံးထဲမှာ ခုနက ရူပ၊ သဒ္ဒ၊ ဂန္ဓ၊ ရသ၊ ဖောဋ္ဌဗ္ဗဆိုတာက လွဲရင် ကျန်တဲ့ရုပ်တွေ အကုန်လုံး ဓမ္မာရုံထဲ ပါသွားတယ်၊ စိတ်တွေအားလုံး ဒီထဲမှာ ပါသွားတယ်၊ စေတသိက်တွေအားလုံး ဒီထဲမှာ ပါသွားတယ်၊ ပညတ်တွေအားလုံး ဒီထဲမှာ ပါသွားတယ်၊ နောက်ဆုံး နိဗ္ဗာန်ထိအောင် ဒီထဲမှာ ပါသွားတယ်၊ ဒီလို မှတ်ရမယ်။
အဲဒီတော့ အာရုံ(၆)ပါးနဲ့ ၀တ္ထုရုပ် (၆)ပါး၊ အဲဒီ နှစ်ခုက အင်မတန်မှ အရေးကြီးတယ်တဲ့၊ စိတ်ဖြစ်တာကို ရှင်းပြောဖို့ရန် အတွက် အဲဒီ(၆)မျိုးစီကို သိထားဖို့ လိုအပ်တယ်နော်၊ ဒီ (၆)ခုကို သိထား မှတ်ထားရမယ်။
ဒွါရ ၆-ပါး
နောက်တစ်ခု ဘာသိဖို့လိုလဲ ဆိုလို့ရှိရင် ‘ဒွါရ’ လို့ခေါ်တဲ့ တံခါးပေါက်ပေါ့၊ အာရုံတွေဝင်တာ သို့မဟုတ် အသိစိတ်တွေ ၀င်တာ၊ အာရုံဆက်သွယ်လို့ရတဲ့ တံခါးပေါက်တွေပဲ၊ ဒီတံခါးပေါက်ကလည်း (၆)ခုရှိတယ်၊ ဒွါရ(၆)ခုလို့ ခေါ်တယ်၊ အဲဒီဒွါရ(၆)ခုမှာ ဒွါရ (၅)ခုဟာ ခုနက ‘base’ ၀တ္ထုရုပ်မှာ ပါတဲ့ ပသာဒရုပ် ၅-ခုနဲ့ အတူတူပဲ။
- စက္ခုပသာဒရုပ်ကို စက္ခုဒွါရ လို့ ခေါ်တယ်။
- သောတပသာဒရုပ် ကို သောတဒွါရ လို့ ခေါ်တယ်။
- ဃာနပသာရုပ်ကို ဃာနဒွါရ လို့ ခေါ်တယ်။
- ဇိဝှာပသာဒရုပ်ကို ဇိဝှါဒွါရ လို့ ခေါ်တယ်။
- ကာယပသာဒရုပ်ကို ကာယဒွါရ လို့ ခေါ်တယ်။
မနောဒွါရဆိုတာ
နောက်ပြီးတော့ မနောဒွါရလို့ဆိုတဲ့ mind door ကျတော့ ဘ၀င်စိတ်ကို ခေါ်တာတဲ့၊ အဲဒီ ဘ၀င်စိတ်ဆိုတာက ကံကနေဖန်တီးပြီးတော့ ကံရဲ့အကျိုးဆက်အနေနဲ့ ခန္ဓာကိုယ်ထဲမှာ potentiality အနေအထားမျိုး၊ တခြားစိတ်တွေ ပေါ်ဖို့ရာအတွက် အခြေခံစိတ်သဘောမျိုးပေါ့နော်၊ အဲဒီ ဘ၀င်စိတ်က ရှိတယ်၊ ရှိတယ်ဆိုတာ ရှိနေတာ မဟုတ်ဘူး၊ သူလည်း သူ့အာရုံနဲ့သူ ဖြစ်နေတာ၊ မိခင်ရဲ့ ၀မ်းထဲမှာ ပထမဆုံးသန္ဓေတည်တဲ့ စိတ်ကလေးကိုပင် ဘ၀င်စိတ်လို့ ပြောင်းခေါ်တာ၊
ပထမဆုံးဖြစ်တဲ့စိတ်ကိုတော့ ပဋိသန္ဓေစိတ် လို့ခေါ်လိုက်ပြီး ဒီပဋိသန္ဓေစိတ်နောက် ထပ်ပေါ်လာတဲ့ စိတ်ကလေးကျတော့ ဘ၀င်စိတ် လို့ ခေါ်တယ်၊ နောက်ဆုံး သေခါနီးမှာ ဖြစ်တဲ့စိတ်ကိုကျတော့ စုတိစိတ် လို့ခေါ်တယ်၊ဒါကြောင့်မို့ ပဋိသန္ဓေစိတ်ရယ်၊ ဘ၀င်စိတ်ရယ်၊ စုတိစိတ်ရယ်ဆိုတာ တစ်သက်တာမှာ လုံးဝ တူတယ်လို့ မှတ်ထားရမယ်။
ဒီ စိတ်တစ်မျိုးတည်းပဲလို့ ဆိုတယ်၊ ပြောင်းတာ မဟုတ်ဘူး၊ ဒါပေမယ့် ထာဝရ ရှိနေတာလားဆိုရင် တော့ မရှိဘူး၊ သူလည်းပေါ်နေတဲ့ဟာတွေပဲ၊ သူက ပေါ်တာတော့ အဓိက ကံတည်းဟူသော အကြောင်းတရားပေါ်မှာ အခြေပြုပြီး ပေါ်တာ၊ ကျန်တာတွေကတော့ ကံကို အခြေပြုပြီး ပေါ်တာ မဟုတ်ဘူး၊ potentiality အကြောင်းပေါ်မှာ ဖြစ်နိုင်တဲ့ အနေအထား ပေါ်မှာ ပစ္စုပ္ပန် အကြောင်းတရားတွေကနေ ပေါင်းဆုံလိုက်တဲ့ အခါကျတော့မှာ ပေါ်လာတာ။
*ဆက်ရန်* {ဘ၀င်စိတ်၊ စိတ်ဖြစ်ပုံ၊မြင်သိစိတ်ဖြစ်ပုံ၊ အကြောင်းဆုံလို့ဖြစ်၊ အနိစ္စအဓိပ္ပါယ်} အား ဆက်လက်ရေးသား ပူဇော်ပါမည်။
*ကောက်နှုတ်ချက်* အဂ္ဂမဟာပဏ္ဍိတ အရှင်နန္ဒမာလာဘိဝံသ (Ph.D)
အဘိဓမ္မာ မြတ်ဒေသနာ (ပထမတွဲ) (စာ ၁၆၅-၁၇၂) မှ ကောက်နှုတ်ရေးသား ပူဇော်ပါသည်။
No comments:
Post a Comment