ကြားသိစိတ်ဖြစ်ပုံ
ထို့အတူပဲ “သောတဉ္စ ပဋိစ္စ သဒ္ဒေ စ၊ ဥပ္ပဇ္ဇတိ သောတ၀ိညာဏံ”
ကြားသိစိတ်ကလေးဟာလည်း ဒီအတိုင်းပဲတဲ့၊ သောတပသာဒရုပ်လို့ဆိုတဲ့
အခြေခံဝတ္ထုရုပ်ရယ်၊ ပသာဒရုပ်ဆိုတဲ့ အသံရုပ်ရယ်၊ အဲဒီ (၂)ခု
ထိခိုက်တဲ့အခါကျတော့ ထိခိုက်တာလည်း အလွန်မြည်တယ်နော်၊ ကောင်းကင်မှာ အပူနဲ့
အအေးတို့ တိုက်ခိုက်ပြီးတော့ အသံကြီးတွေဟာ အောက်ကတီးတဲ့
အသံထက်တောင်ပြင်ထန်သေးတယ်၊ မိုးကြိုးများပစ်လိုက်ရင် ပိုဆိုးသေးတယ်။
အဲဒီတော့
နားထဲမှာ အသံနဲ့ ခုနက သေတာပသာဒနဲ့ တိုက်လိုက်တဲ့အခါ အသံသိတဲ့စိတ်ကလေး
ပေါ်လာတာ၊ ဒါလည်း နားထဲက ထွက်လာတာ မဟုတ်ဘူးတဲ့၊ သိတဲ့စိတ်ကလေးဟာ
အကြောင်းကြောင့် ပေါ်လာတယ်။
ပိုရှင်းအောင်
မီးခြစ်ဘူးကလေးကိုပဲ စဉ်းစား၊ ဂက်(စ်) မီးခြစ်ဘူးလေးကို ကြည့်လေ၊ မီး
ရှိနေလို့ရှိရင် ပူမှာပေါ့၊ လောင်မှာပေါ့၊ မီးမရှိဘူးဆိုတာ သေချာတယ်လေ၊
မရှိဘူးဆိုတာ လက်တွေ့ ပြလို့ရတယ်၊ အိမ်ထောင်ထဲ ထည့်သွား၊ အကယ်၍
မီးရှိတယ်ဆိုရင် ဘယ်ခံနိုင်မလဲ၊ လောင်သွားမှာပေါ့၊ မရှိဘူးဆိုတာ သေချာတယ်၊
သို့သော် အကြောင်းတစ်ခုထပ်ပြီးတော့ ထည့်လိုက်တယ်၊ ဒါက လူက ဖိခြစ်လိုက်တယ်၊
ဟော မီးလောင်တယ်၊ အဲဒီသဘောပဲ မှတ်ထားကြ။
နံသိ လျက်သိ ထိသိစိတ်ဖြစ်ပုံ
ထို့အတူပဲ၊
နံသိစိတ်ကလည်းပဲ နှာခေါင်းနဲ့အနံ ဆုံမိတဲ့အခါမှာ ပေါ်လာတယ်၊
လျက်သိစိတ်ကပိုပြီး သိသာတာပေါ့၊ ဒါကြောင့်မို့ ဟင်းချက်ပြီးတဲ့အခါ
မြည်းရတယ် မဟုတ်လား၊ မမြည်ရင် ချိုတယ် ငန်တယ် မသိဘူး၊ တစ်ခါတစ်လေ
သရက်သီးမှည့်ကလေး ခွဲထားတဲ့အခါကျတော့ မျက်စိက ကြည့်တော့ ချိုတယ်လို့ သညာက
ထင်မှတ်ထားတာ၊ သွားစားတော့ အမလေး ချဉ်လိုက်တာ မပြောနဲ့တော့၊ တကယ်
အဆုံးအဖြတ် ပေးနိုင် တာကတော့ လျှာပေါ်ရောက်မှ သိသွားတာ မဟုတ်လား။
ချိုတယ်ထင်လို့
စားတာ၊ ချဉ်တာ တွေ့ချင်တွေ့မယ်၊ ချဉ်တယ်ထင်တာ၊ ချိုတာ တွေ့ကောင်းတွေ့မယ်၊
ပေါ့တယ်လို့ ထင်တာ ငန်ချင်လည်း ငန်နေလိမ့်မယ်၊ အားလုံးဟာ လျှာကျမှ
သိတာချည်းပဲ မဟုတ်လား၊ ဒါကြောင့် မြတ်စွာဘုရားက -
ဇိဝှာပသာဒရယ်
ရသာရုံရယ် ပေါင်းစပ်လို့ အရာသိတဲ့ အသိစိတ်ကလေး ပေါ်လာတာပါတဲ့၊ ထို့အတူပဲ၊
ကာယပသာဒနဲ့ ဖောဋ္ဌဗ္ဗရုံ ဆုံမိသွားတဲ့အခါကျတော့ ထိသိစိတ်ကလေး ပေါ်တာပါတဲ့။
အတွေးစိတ်ဖြစ်ပုံ
နောက်တစ်ခါ
အတွေးအာရုံတွေ ကျန်တဲ့အာရုံတွေကျတော့ ဘ၀င်စိတ်ကလေးကို သွားတိုက်တာ၊
အဲဒါကျတော့ ကြည့်ရမှာကတော့ နာမ်-နာမ်ချင်း တိုက်တာလည်း ပါတယ်၊
ဘာဖြစ်လို့တုန်းဆိုတော့ အာရုံက နာမ်ဆိုလို့ရှိရင် ဘ၀င်စိတ်ကလေးကလည်း
နာမ်ပဲ၊ နာမ်-နာမ်ချင်းတိုက်ပြီးတော့ အသိစိတ်ကလေးပေါ်တယ်၊ အဲဒါကတော့ မနောဝိညာဏံ
ဆိုတဲ့ အစွမ်းထက်တဲ့စိတ်တွေ ပေါ်လာတယ်၊ ဘ၀င်စိတ်ကလေးနဲ့ ဓမ္မာရုံနဲ့
ဒီနှစ်ခုပေါင်းစပ်ပြီး တိုက်ခိုက်မိလိုက်တဲ့ အချကျတော့ တခြားအသိစိတ်တွေ
ပေါ်လာတယ်၊ ကုသိုလ်စိတ်တွေ ပေါ်မယ်၊ အကုသိုလ်စိတ်တွေပေါ်မယ်၊
အစွမ်းထက်တဲ့စိတ်တွေ အဲဒီမှာ အတွေးစိတ်တွေ ပေါ်တယ်၊ အဲဒီတော့ -
ဘ၀င်စိတ်နဲ့ ဓမ္မာရုံ
“မနဉ္စ ပဋိစ္စ ဓမ္မေ စ” ဒီနေရာမှာ “ဟဒယဉ္စ ပဋိစ္စ ဓမ္မေ စ”
လို့ ဘုရားက မဟောတာ စဉ်းစားကြည့်ပေါ့၊ ကျန်တဲ့ စက္ခု၊ သောတ၊ ဃန၊ ဇိဝှါ၊
ကာယ၊ base တွေက ရုပ်တရား တွေဖြစ်လျက်သားနဲ့ ဒီ(၆)ခုမြောက်
ရောက်တဲ့အခါကျတော့ - “မနဉ္စ ပဋိစ္စ ဓမ္မေ စ”
လို့ ဟောပြီး “ဟဒယဉ္စ ပဋိစ္စ” လို့ မဟောဘူး၊ ဟဒယ၀တ္ထုသက်သက်နဲ့
မပေါ်နိုင်ဘူးတဲ့၊ အဲဒီတော့ အခြေခံ ဘ၀င်စိတ်နဲ့၊ ဘ၀င်စိတ်ကနေ ဖြတ်သန်းရတာ
ဖြစ်တယ်လို့ ဟောတာ၊ ဘ၀င်စိတ်က ဒီနေရာမှာ Mind door ပဲ၊ အဲဒီက
ဖြတ်သန်းရတာဖြစ်လို့ ဘ၀င်စိတ်ကလေးနဲ့ ဓမ္မာရုံနဲ့ ပေါင်းစပ်
တွဲမိလိုက်တဲ့အခါကျတော့ မနေ၀ိညာဏ် စိတ်ဆိုတဲ့ အစွမ်းထက်တဲ့
စိတ်တွေပေါ်လာတယ်လို့ ဒီလို ဟောတယ်။
စိတ် ၆-မျိုး
ကဲ
- ခုကြည့်လိုက်မယ်ဆိုရင် အကြမ်းနည်းအားဖြင့် စိတ်(၆)မျိုးကို
ပြောလိုက်ပြီးပြီ၊ မြင်သိစိတ်တဲ့၊ စာလိုပြောရင် “စက္ခုဆိုတာ မျက်စိကို
ပြောတာ၊ ၀ိညာဏ်-သိတာကို ပြောတာ၊ မျက်စိမှာပေါ်လာတဲ့ အသိစိတ်၊ “စက္ခုဝိညာဏ်စိတ်”၊ မျက်စိကို မှီပြီးပေါ် လာတဲ့ အသိစိတ်လို့ ဒီလိုပြောတာ၊ “သေတ၀ိညာဏ်စိတ် နားကို မှီပြီးပေါ်လာတဲ့ အသိစိတ်၊ “ဃန၀ိညာဏ်စိတ်” နှာခေါင်းကို မှီပြီး ပေါ်လာတဲ့ အသိစိတ်၊ “ကာယ၀ိညာဏ်စိတ်” ကာယကို အမှီပြုပြီး ဖြစ်ပေါ်လာတဲ့အသိစိတ်၊ “မနောဝိညာဏ်စိတ်” မနကို
မှီပြီး ဖြစ်ပေါ်လာတဲ့ အသိစိတ်၊ ဘ၀င်မနကို မှီပြီး ဖြစ်ပေါ်လာတဲ့အသိစိတ်
အားလုံး ပေါင်းလိုက်တဲ့အခါ စိတ်(၆)မျိုး မရဘူးလား၊ အဲဒီ (၆)မျိုးဟာ
စေတသိက်တွေနဲ့ ပေါင်းပြီးတော့ နာမ်တရားတွေ ဘယ်လို ဖြစ်ပေါ်လာတယ် ဆိုတာကို
ဟောနေတာပါ။
နိဂုံးစကား
ဒီကနေ့
နာမ်အကြောင်း ကို လေ့လာလိုက်တာ နောက်ထပ်ဆက်ပြီး လေ့လာဖို့
အများကြီးလိုသေးတယ်၊ တစ်ခုချင်း တစ်ခုချင်း သဘောပေါက်ထားရမှာက
နာမ်တရားဆိုတာ ရှိနေနှင့်တဲ့ တရားမဟုတ်ဘူး၊ ရုပ်တရားတွေကို မှီပြီး
အကြေင်းတိုက်ဆိုင်မှ ဖြစပေါ်လာတဲ့ တရားမျှသာ ဖြစ်တယ် ဆိုတာပါပဲ။
ကဲ-နာမ်တရားတွေ
ပေါ်လာပုံကို သိရှိရပြီ၊ နောက်ရက်တွေမှာ စိတ်ရဲ့ အကြောင်းတရားတွေကို
သီးသန့်ဟောမယ်၊ ပြီးတဲ့အခါ စိတ်ရဲ့ စွမ်းအားတွေ သီးသန့်ဟောမယ်၊ စိတ်ရဲ့
အကြေးတွေဟာ ဘာတွေလဲဆိုတာ ဟောမယ်၊ စိတ်ကို အစွမ်းထက်စေတဲ့ စွမ်းအားတွေဟာ
ဘာတွေလဲဆိုတာ သီးသန့်ဟောမယ်၊ စိတ်အကြောင်းကို သေသေချာချာ လေ့လာပြီးတဲ့
နောက်တစ်ခါ စိတ်နဲ့ရုပ် ပေါင်းစပ်ပြီး ဘယ်လို လှုပ်ရှားကြသလဲ၊ စိတ်တွေဟာ
ဘယ်ပုံဘယ်နည်းနဲ့ ဖြစ်စဉ်ထဲမှာ ရှိတယ်ဆိုတာလေးကို အဆုံးသတ် အနေနဲ့
ဟောပြီးတော့ နိဗ္ဗာန်ကို ဘယ်လိုရောက်တယ်ဆိုတာ ဟောမယ်။
ဒါကြောင့်
တရားချစ်ခင် သူတော်စင် ပရိတ်သတ်အပေါင်းတို့သည် ဒီကနေ့ နာမ်တရားကို
လေ့လာသုံးသပ်ခြင်း ဆိုတဲ့ အပိုင်းမှာ နာမ်တရားလို့ ခေါ်တဲ့
စိတ်,စေတသိက်တွေဟာ ရုပ်ကို အမှီပြုပြီးတော့ ခုလို ဆိုင်ရာ ဆိုင်ရာ
အကြောင်းတရားတွေနဲ့ တိုက်ဆိုင်တဲ့အခါမှသာ ပေါ်ပေါက်လာကြတယ်၊ အဲဒီ
သဘာဝတရားတွေကို ဗုဒ္ဓမြတ်စွာ ဟောတဲ့အတိုင်း သိရှိကြသဖြင့်
ကိုယ့်ခန္ဓာကိုယ်မှာ ထာဝရ မြဲနေတဲ့အရာ “ငါ” လို့ ထင်နေတဲ့အရာဆိုတာ
ဘာတစ်ခုမှ မရှိပါလား၊ တကယ်တော့ သူ့အကြောင်းနဲ့သူ ဖြစ်ပြီး၊ သူ့ဟာသူပေါ်ပြီး
ပျောက်နေတဲ့ အရာသာ ဖြစ်တယ်။
အဲဒီတရားတွေဟာ
“ငါ” လည်း မဟုတ်ဘူး၊ ငါ့ဟာလည်း မဟုတ်ဘူးဆိုတဲ့ အသိဉာဏ်ကလေး ၀င်လာတာဟာ
“သမ္မာဒိဋ္ဌိ”၊ မှန်ကန်သော အမြင်ပလို့ အားလုံး ကိုယ်စီကိုယ်စီ
သဘောပေါက်ပြီးတော့ အားလုံး သမ္မာဒိဋ္ဌိဉာဏ် ရင့်သန်စေရန် ကျင့်ကြံကြိုးကုတ်
အားထုတ်နိုင်ကြပါစေကုန် သတည်း။
“သာဓု - သာဓု - သာဓု”
*ကောက်နှုတ်ချက်* အဂ္ဂမဟာပဏ္ဍိတ အရှင်နန္ဒမာလာဘိဝံသ (Ph.D)
အဘိဓမ္မာ မြတ်ဒေသနာ (ပထမတွဲ) (စာ ၁၁၇၇-၁၈၂) မှ ကောက်နှုတ်ရေးသား ပူဇော်ပါသည်။
No comments:
Post a Comment