အနာဂတ်သာသနာရေး အပိုင်း(၁၈) ပညာရှိမှ ပညာရှိကို သိနိုင်ပုံ

ဓာတ်တော်အပ်နှင်းပွဲ

[ဤကျမ်းကို ပုံနှိပ်နေစဉ် သတင်းစာ၌ တွေ့ရ၍ ထည့်သွင်းချက်]

ပညာရှိမှ ပညာရှိကို သိနိုင်ပုံ

“ဗုဒ္ဓသည် လူ၏ အစကို မဟောပြနိုင်ခဲ့၊ လောကဓာတ် ဆရာကြီးတို့သာ  လူ၏ အစကို ပြနိုင် သည်” ဟု ဗုဒ္ဓရှင်တော်နှင့် မတန်မရာသော စွပ်စွဲသံကို “ဗုဒ္ဓသာသနာ ထွန်းကားပါပေသည်”ဟု ချီးကျူးခံရသော မြန်မာနိုင်ငံ၌ (အချို့လူများအထံမှ) ကြားနေရစဉ် ဗုဒ္ဓဘာသာ မထွန်းကားသော အိန္ဒိယနိုင်ငံဝယ် (၁၄၊ ၁၊ ၄၉) ပြာသို လဆုတ် တစ်ရက်နေ့က အဂ္ဂသာဝကနှစ်ပါး၏ ဓာတ်တော်များ ကို မဟာဗောဓိအသင်းသို့ အပ်နှင်းပွဲ အခမ်းအနား၌ ဗုဒ္ဓဂုဏ်တော်များကို ထုတ်ဖော်ချီးကျူးသံ ကြားရသောအခါ “အင်း…ပညာရှိမှ ပညာရှိအကြောင်းကို ကောင်းကောင်း သိနိုင်ပေတာပဲ”ဟု (ကျမ်း လာအတိုင်း) စဉ်းစားမိပါသည်၊ ထိုအပ်နှင်းပွဲ၌ ပရိသတ်ငါးသိန်းခန့် တက်ရောက်ကြ၍ နိုင်ငံကျော် ပဏ္ဍိတ်ကြီးတွေ အများအပြားပင် ဗုဒ္ဓဂုဏ်တော်ကို ထုတ်ဖော်ချီးကျူးပါသတဲ့။

ပဏ္ဍိတ်နေရူး ချီးကျူးပုံ

အိန္ဒိယနိုင်ငံတော်ဝန်ကြီးချုပ် ပဏ္ဍိတ်နေရူးကိုယ်တိုင် ထိုအခမ်းအနားကြီးကို ဖွင့်လှစ်၍ ဓာတ်တော်များ၏ကိန်းဝပ်ရာ ရွှေကြုတ်ကို မဟာဗောဓိအသင်း ဥက္ကဋ္ဌအား အပ်နှင်းစဉ် မိန့်ခွန်း ပြောသည်မှာ အဂ္ဂသာဝက ရဟန္တာနှစ်ပါး၏ ဤဓာတ်တော်များကို လွန်ခဲ့သော အနှစ်တစ်ရာကျော် လောက်ကပင် စံချီမြို့မှ လန်ဒန်မြို့ ဗီတိုးရီးယားအဲလဘတ် မြူစီယံပြတိုက်တွင် ထားရှိခဲ့ကြောင်း ဗုဒ္ဓရှင်တော်၏၀ါဒမှာ ကမ္ဘာ့ငြိမ်းချမ်းရေးကို ညွှန်ပြတော်မူသော ၀ါဒတော်ဖြစ်ကြောင်း, ခေါင်းဆောင် ကြီး မဟတ္တမဂန္ဒီသည်လည်း ထိုဗုဒ္ဓ၏၀ါဒ(မေတ္တာဝါဒ)ကို လက်ကိုင်ပြုကာ ညွှန်ကြားလေ့ရှိကြောင်း, ယခုကမ္ဘာ့အခြေအနေအရ ငြိမ်းချမ်းရေး ပြန်လည်ရနိုင်သော ၀ါဒမှာ ထိုဗုဒ္ဓဘာသာဖြစ်ကြောင်း စသည်ဖြင့် အကျယ်တ၀င့် မိန့်မြွက်ပါသည်။

ဘုရင်ခံတစ်ဦး ချီးကျူးပုံ

ဘင်္ဂလား အနောက်ပိုင်း ဘုရင်ခံဖြစ်သော ဒေါက်ကက်ဂျူးက ချီးကျူးပြန်သည်မှာ…              အိန္ဒိယသည် လွန်လေပြီးသော ရှေးပဝေသဏီကာလ၌ တရုပ်ပြည်နှင့်လည်းကောင်း, အာရှအရှေ့တောင်ပိုင်းရှိ အခြားတိုင်းပြည်များနှင့်လည်းကောင်း ရင်းနှီးစွာ ဆက်ဆံဖူးရာ ထိုဆက်ဆံခဲ့ ရခြင်းသည် အရှင်ဂေါတမကြောင့် ဖြစ်၏၊ လွန်ခဲ့သော နှစ်ပေါင်းတစ်ထောင်ခန့်အချိန်၌ အိန္ဒိယသည် ဂေါတမဗုဒ္ဓ၏ အယူဝါဒကို စွန့်လွှတ်လိုက်သည်မှ စ၍ ထိုတိုင်းပြည်များနှင့် ရင်းနှီးခြင်း ကင်းဝေးကာ လွတ်လပ်ရေးလည်း ဆုံးရှုံးခဲ့ရတော့၏၊ အိန္ဒိယတိုင်းသားများသည် လွတ်လပ်ရေးအတွက် ကြိုးပမ်း ခဲ့သည်မှ စ၍ ဂေါတမဗုဒ္ဓ၏ အတုမရှိသော ကိုယ်တော်အဖြစ်နှင့် ပြိုင်ဘက် မရှိအောင် ဖြူစင်သန့်ရှင်း သော တရားတော်ကို တဖြည်းဖြည်းတိုး၍ အသိအမှတ်ပြုခဲ့ကြသည်မှာ လေးနက်သောအဓိပ္ပာယ်ရှိပါ သည်၊ ဂေါတမဗုဒ္ဓသည် အိန္ဒိယပြည်နှင့် တရုတ်ပြည် အာရှအရှေ့တောင် ပိုင်းရှိ တိုင်းသူပြည်သား တို့ကို တလုံးတစည်းဖြစ်အောင် စည်းရုံးနိုင်သော သတ္တိထူးရှိပါသည်။

          မိမိတို့သည် ဂေါတမဗုဒ္ဓနှင့် ထိုဗုဒ္ဓ၏တရားတော်များစွာကို လေးစားရမှန်း နားလည်ကြလေ, လွတ်လပ်ရေးကို ပိုမိုခိုင်မြဲအောင် ထိန်းသိမ်းနိုင်လေဖြစ်၏၊ ဆင်းရဲဒုက္ခ ကြုံတွေ့ရ၍ စိတ်နှလုံး တုန်လှုပ်ချောက်ချားခြင်း ဖြစ်ရတိုင်း ဂေါတမဗုဒ္ဓ၏ တရားတော်ကို ပိုမို၍ ဆည်းကပ်သင့်ကြပါသည်၊…  ဤသို့ စသည်ဖြင့် ချီးကျူးပါသတဲ့။

အသင်းဥက္ကဋ္ဌ ချီးကျူးပုံ

မဟာဗောဓိအသင်းဥက္ကဋ္ဌ ဒေါက်တာမူကာဂျီက မိန့်မြွက်ပြန်သည်မှာ … ဗုဒ္ဓ၏ သာသနာတော်          သည် ကမ္ဘာအနှံ့ ပျံ့လျက်ရှိသော်လည်း ဗုဒ္ဓ၏ ဇာတိချက်ကြွေရာဌာနဖြစ်သော အိန္ဒိယပြည်၌ ထိပ်တန်းအဖြစ် တည်လျက် မရှိသည်မှာ သတ္တ၀ါတို့ ကံကြမ္မာ၏ ပြက်ရယ်ပြုခြင်းကို ခံနေရခိုက် ဖြစ်သည်ဟု ဆိုထိုက်ပါပေသည်၊ စင်စစ်မှာ အိန္ဒိယတိုင်းသားထဲမှ အနည်းငယ်တို့သာ ဗုဒ္ဓဘာသာဝင် ဟု အသိအမှတ် ပြုကြသော်လည်း သတ္တ၀ါအချင်းချင်း မေတ္တာပွားများမှုဟူသော တရားတော်ကား အိန္ဒိယတိုင်းသားတို့၏ သွေးသားအတွင်းသို့ နှစ်ပေါင်းများစွာကပင် တဖြည်းဖြည်း စိမ့်ဝင်နေပါသည်၊ သာ၍ ကြီးကျယ်သော အိန္ဒိယပြည်ကြီး တည်ထောင်၍ ပတ်ဝန်းကျင် တိုင်းပြည်များ၏ လေးစားခြင်း ကို ခံယူရရှိခဲ့ခြင်းမှာ အခြားအကြောင်းများထက် ဗုဒ္ဓရှင်တော် ဖွားတော်မူရာ ဖြစ်ခြင်းသည် အဓိက အကြောင်းရင်း ဖြစ်ပါကြောင်း… ဤသို့ စသည်ဖြင့် မိန့်မြက်လေသည်။

မှတ်ချက်။       . အထက်ပါ ပညာရှိကြီးများ၏ မိန့်ခွန်းကို …    ကောက်ချက် ချလိုက်သော အခါ ဗုဒ္ဓ၏၀ါဒသည် မေတ္တာ (တစ်ယောက်နှင့်တစ်ယောက်, တစ်ပြည်နှင့်တစ်ပြည် သွေးမခွဲဘဲ ကောင်းကျိုးကို အစစ်အမှန် လိုလားသော) တရားပင်ဖြစ်၏၊ ထိုဝါဒသည် ယနေ့ကမ္ဘာကို ပျံ့နှံ့နိုင်လျှင် ယနေ့ပင် ငြိမ်းချမ်းရေး ရပြီဟု မုချ မှတ်ထိုက်၏၊ [စစ်အတွင်းက ဂျပန်နန်းရင်းဝန် တိုဂျိုသည် စစ်တရားခံဖြစ်မှ ဗုဒ္ဓ၏တရားတော်ကို လေ့လာကြည့်ရာ “ဤ တရားကို စောစောက လေ့လာရလျှင် သူကိုယ်တိုင် စစ်တိုက်ချင်မည် မဟုတ်ပါ”ဟု ပြောဆိုသွားသတဲ့၊] ကြီးနိုင်ငယ်ညှဉ်း (မိမိတို့ အင်အားရှိခိုက် အားနည်းသူများကို ညှဉ်း၍) မေတ္တာကင်းမဲ့ ကိုယ်ကျိုး(ကိုယ့်အမျိုးသားအကျိုး)ကိုသာ ငဲ့သောဝါဒကား“မှန်ကင်း တစ်လှည့် ထင်းတစ်လှည့်” လှည့်ကာ သူတစ်ပြန် ငါတစ်ပြန်နှင့် ဧကန် မငြိမ်းချမ်းနိုင်သောဝါဒသာ ဖြစ်၏၊ 

ကမ္ဘာကို ထားဘိဦး… မြန်မာနိုင်ငံ၌ပင် ဆင်းရဲသားဝါဒ, ဓနရှင်ဝါဒ (လက်ဝဲ၀ါဒ, လက်ယာဝါဒ)ဟု စကတည်းက မေတ္တာနှင့်ပြောင်းပြန်ဖြစ်နေသောဝါဒ, ရန်တိုက်သော ၀ါဒကို စတည်ကြ၏၊ ဤနည်းသည် မြန်မာနိုင်ငံတော်ကို ငြိမ်းချမ်းသာယာစေရန် ဧကန်မဖြစ်နိုင်ဟု ဆိုလို၏၊ အမှန်မှာ ဓနရှင်တို့သည် ဆင်းရဲသားတို့အပေါ်၌ သနားညှာတာမှု ကရုဏာ, ထိုသူတို့ ချမ်းသာစေလိုသော မေတ္တာဖြင့် အရာရာဆက်ဆံ၍ ဆင်းရဲသားတို့ကလည်း “ငါတို့အပေါ် ညှာတာပါပေသည်”ဟု ပြန်၍ အကျိုးလိုလားသော မေတ္တာဖြင့် ဆက်ဆံကြမှသာ (ထိုသို့ ဆက်ဆံ နိုင်အောင် ရဟန်းတော်နှင့်လူကြီးများ၏ မေတ္တာအကျိုးပြဓမ္မစက်နှင့် အစိုးရ၏ ပြေပြေပြစ်ပြစ် စနစ်ကျသော အာဏာစက်ကို သုံးမှသာ) ပြည်ထောင်စု မြန်မာနိုင်ငံတော် သာယာပေလိမ့်မည်။

          ထို့ပြင်… “ဂေါတမဗုဒ္ဓသည် အိန္ဒိယပြည် တရုပ်ပြည် အာရှ အရှေ့တောင်ပိုင်း တိုင်းသူပြည်သားတို့ကို တလုံးတစည်းတည်း ဖြစ်စေနိုင်သော သတ္တိထူးရှိပါပေသည်”ဟု ချီးကျူး ကြခြင်းသည် စစ်ဖြစ်စက မြန်မာလူမျိုးအများပင် ဂျပန်ကို အားထားခဲ့ပုံကို သတိရစေတော့၏၊ ဘာ့ကြောင့် အားထားခဲ့ကြသနည်း၊ ဗုဒ္ဓဘာသာဝင်များဟု ဆိုသောကြောင့်ပင်တည်း၊  ဘုန်းကြီး၏ ကျောင်းတိုက်သို့ ဂျပန်ဘုန်းကြီးခေါ် စစ်သားတချို့ ရောက်လာရာ သူတို့က ဘုန်းကြီးကို (ဘုန်းကြီးဖြစ်၍) အထူးလေးစားပုံရ၏၊ ဘုန်းကြီးကလည်း အထူး သနားမိတော့၏၊ 

ဘာသာတူသူသည် တစ်ဦးနှင့်တစ်ဦး ဤမျှလောက် သက်ညှာလေးစား မေတ္တာပွားစေနိုင်၍ ဘာသာကွဲမှုလည်း ထိုမျှလောက်ပင်  စိတ်ဝမ်းကွဲစေနိုင်ရကား… ယခုအချိန်မှာ တိုင်းရင်းသားအချင်းချင်း မသင့်မမြတ် ဖြစ်နေရာ၌လည်း ဘာသာကွဲပြားမှုသည်  အကြောင်းတစ်ခု  ဖြစ်နိုင်ရကား  တိုင်းပြည်၏ ခေါင်းဆောင်တိုင်း  ဘာသာရေးကို  လျစ်လျူမရှုထိုက်ကြောင်း လက်တွေ့ပြယုဂ်တစ်ခုဟု သတိပြုသင့်ကြပေသည်၊ ဤအချက်များကို စဉ်းစားလိုက်သောအခါ ယခုအချိန်၌ တောင်တန်းသာသနာပြု အရှင်များနှင့် လူကြီးလူကောင်းများကို ပြည်ထောင်စုမြန်မာနိုင်ငံ သွေးစည်းအောင် စီမံရာ၌ တစ်နံပါတ် ကျေးဇူးရှင်များဟု မှတ်သား ထိုက်ပါပေသည်။

 

Credit to

တင်ပြသူ Yanan Sanein အချိန် 6:52 PM