အနာဂတ်သာသနာရေး အပိုင်း(၄၈) အတ္တကိလမထအကျင့်

အတ္တကိလမထအကျင့်

          [အတ္တ = အတ္တဘော = ခန္ဓာကိုယ် +  ကိလမထ=ပင်ပန်းကြောင်းအကျင့်]

ဗုဒ္ဓ ထွန်းပေါ်တော်မမူမီက ရသေ့တို့သည် ခန္ဓာကိုယ်တွင်း၌ ကိလေသာ ကာမစိတ်တွေ သောင်းကျန်းနေခြင်း၏ အပြစ်ကို မြင်ကြ၍ ထိုကာမစိတ်ဓာတ် နည်းပါးစေနိုင်သော အကျင့်ကို ရှာကြလေရာ ““ခန္ဓာကိုယ် ၀၀ဖြိုးဖြိုးနှင့် တိုးတက်စည်ပင်နေလေသမျှ ကာမတဏှာ ကိလေသာ အစိုအစေးဓာတ်လည်း မပြတ်စိုနေစရာ ရှိ၏၊ ဤခန္ဓာကိုယ် မစိုမလန်း ခြောက်ခန်းနေလျှင် ထန်းနို့ခြောက်မှ ထန်းရည် မထွက်နိုင်သကဲ့သို့ ကိလေသာ အစိုဓာတ်လည်း ခြောက်ကပ် ပျောက်ကွယ်ဖွယ် ရှိ၏””ဟု ကြံဆပြီး မိမိ ကိုယ်ခန္ဓာ ပင်ပန်းနွမ်းနယ်အောင် နှယ်ကြလေတော့၏၊ အစာကို ခြိုးခြံကာ ပဲပြုတ်ရည်ကလေးမျှလောက်ကိုသာ စားသောက်၍ ကျင့်ကြ၏၊ (အလောင်းတော်သည်ပင် ထိုအကျင့်ကို ကျင့်ခဲ့သေး၏၊)

အချို့ကား နွေခေါင်ခေါင် နေပူ၌ လေးမျက်နှာက မီးဖိုကြီး လေးဖို ဖိုပြီးလျှင် ထိုအလယ် ၀င်နေ၍ နေပူနှင့်တကွ အပူငါးမျိုးကို ခံကာ ““ပဉ္စာတပ= ပဉ္စ + အာတပ””ခေါ် အကျင့်ဖြင့် ကိလေသာအစို ပျောက်အောင် ခန္ဓာကိုယ်ကို အပူတိုက်ကြလေ၏၊ အချို့ကမူ ခုတင် စသည်၌ ဆူးတွေ စိုက်ပြီးမှ အနာခံ၍ အိပ်ကြလေ၏၊ ထိုသို့ နာကျင်နေလျှင် ကိလေသာစိတ်တွေ မဖြစ်နိုင်တော့ဟု ယူဆကြလေသည်၊ တချို့ ကား ““ချမ်းပါပေ့””ဟု ဆိုရသော ဆောင်းကာလ၀ယ် ရေချိုးကာ ကိလေသာကို ရေ၌ မျှောကြ၏၊ ထိုအကျင့်မျိုးတွေကို ““အတ္တ ကိလမထအကျင့်””ဟု ခေါ်၏။

          ထိုအကျင့်မျိုးလည်း ခန္ဓာကိုယ် ဒုက္ခရောက်ရုံမျှသာ ဖြစ်၏၊ အပင်ပန်းခံနေခိုက်မှာ ကာမကိလေသာ မဖြစ်ဘဲရှိရာသော်လည်း တစ်ခါတည်း အမြစ်ပြတ်အောင် ခြောက်ကပ်၍ သွားလိမ့်မည် မဟုတ်၊ ထိုအကျင့်ဖြင့် သေသွားစေကာမူ နောက်ဘ၀၌ ကိလေသာ အစိုဓာတ်သည် အမြဲ ပါနေဦးမည်သာ၊ ထို့ကြောင့် ထိုအကျင့်သည် ဒုက္ခရောက်သလောက် အကျိုးမရသဖြင့် အရိယာသူတော်စင်တို့၏ ကျင့်နည်း မဟုတ်သေးချေ၊ သို့ဖြစ်၍ ထိုအကျင့်မျိုးကိုလည်း ရသေ့ ရဟန်း သူတော်စင်တို့ မကျင့်ထိုက်ဟု တားမြစ်တော်မူသည်။

မှတ်ချက်။       ။         ယခုကာလ  ““ကျင့်နေပါသည်”” ဟု  ၀န်ခံကြသော                        ပုဂ္ဂိုလ်များသည် မိမိခန္ဓာကိုယ် အင်အားလိုက်၍ အပင်ပန်းခံသင့်မှ ခံရပေမည်၊ ခန္ဓာကိုယ် အားမရှိဘဲ ဓုတင်ကို အတင်းဆောင်ထားရမည် မဟုတ်၊ ကိလေသာကာမစိတ် မတိုးပွား စေနိုင်သော ပစ္စည်းများကိုလည်း တရားအားထုတ်နိုင်ဖို့ရာ သုံးစွဲကောင်းပါသည်၊ သို့ရာဝယ် စည်းစိမ်ခံစားသောသဘော သက်ရောက်ဖွယ်ရာ အရောင်အ၀ါ ၀င်းဝင်းစက်စက် အသုံး အဆောင်များကိုကား ရှောင်ရှားသင့်ကြသည်၊ ထို့ပြင် ““ကိလေသာ”” ဟု ဆိုလျှင် ကာမစိတ်တစ်မျိုးဟုသာ နားလည်နေကြသော်လည်း အမှန်အားဖြင့် စိတ်ဓာတ်ကို ညစ်နွမ်းစေသော ဒေါသ မောဟ မာန စသည်တို့လည်း ကိလေသာပင် ဖြစ်၏၊ ထိုကိလေသာတို့ကိုကား ရှေ့၌ ပြခဲ့သော အတ္တကိလမထအကျင့်က (ခေတ္တခဏမျှ) တားဆီး နိုင်မည် မဟုတ်ပါ။

မဇ္ဈိမပဋိပဒါ၏အကျိုး                     

[မဇ္ဈိမ = အလယ်အလတ် + ပဋိပဒါ=အကျင့်၊ (နိဗ္ဗာန်သွားကြောင်းလမ်းစဉ်)]            ကာမဂုဏ်လိုက်စားသော ကာမသုခလိ’ကအကျင့်သည် လက်ယာ လမ်းဖြစ်၍ အောက်တန်းကျ၏၊ ပျော့ညံ့လှ၏၊ လျော့သောစောင်း ကြိုးသည် အသံကောင်း မမြည်စေသကဲ့သို့ ထိုအကျင့်ဖြင့် မဂ်ဖိုလ် နိဗ္ဗာန်ကို မရနိုင်၊ ခန္ဓာကိုယ် ဒုက္ခပေးသော အတ္တကိလမထအကျင့်ကား လက်ဝဲလမ်းဖြစ်၍ တင်းလွန်း၏၊ အောက်တန်းကျသည်, ယုတ် ညံ့သည်ဟု မဆိုရသော်လည်း ထို အလွန်တင်း၍ အပြင်းအထန် ကျင့်မှုလည်း (တင်းလွန်းသောစောင်းကြိုးသည် အသံကောင်း မမြည် စေသကဲ့သို့) မဂ်ဖိုလ်နိဗ္ဗာန်ရဖို့ရန် မှန်သောလမ်း မဟုတ်သေးချေ။

          မလျော့မတင်း စောင်းကြိုးညင်းကဲ့သို့ လျော့လည်း မလျော့, တင်းလည်း မတင်းဘဲ ဉာဏ်စက္ခုအလင်းရအောင် ပြုနိုင်, ထိုးထွင်း ၍လည်း သိအောင်ပြုနိုင်, နိဗ္ဗာန်ကိုလည်း သိမြင်စေနိုင်သော အကျင့်သည်သာ အလယ်အလတ်အကျင့် ဖြစ်၍ လမ်းမှန်သော အကျင့် ဖြစ်နိုင်သည်၊ ဗုဒ္ဓအလောင်းတော်ကား ထိုကျင့်စဉ်အမှန်ကို တွေ့မှ ဗုဒ္ဓအဖြစ်သို့ ရောက်ရပေသည်၊ ထိုအကျင့်ကား တခြားမဟုတ်, သမ္မာဒိဋ္ဌိ စသော မဂ္ဂင်ရှစ်ပါးပင်တည်း။

 

Credit to 

တင်ပြသူ Yanan Sanein အချိန် 6:42 PM