ဆရာကြီးက
အတည်ပြုပုံ
ဒီဃတပဿီပြန်လာချိန်ဝယ်
နိဂဏ္ဌဆရာကြီးလည်း ဥပါလိသူကြယ်အမှူးရှိသော ပရိသတ် ကြီးအလယ်မှာ ထိုင်နေခိုက် ဖြစ်၏၊ ထိုအခါ
ဆရာကြီးက ဒီဃတပဿီကို “နေ့လယ်ကြောင်တောင် အချိန်မှာ ဘယ်က လာခဲ့သနည်း”ဟု မေးရာ “အရှင်ဂေါတမဆီက
လာခဲ့ ကြောင်း” အရှင်ဂေါတမနှင့် စကားပြောဆိုရာ “တပည့်တော်က ကာယဒဏ်သည် သာ၍အပြစ်ကြီးကြောင်းပြောလျှင်
ရှင်ဂေါတမက မနောဒဏ်သည် သာ၍ အပြစ်ကြီးကြောင်း ပြန်၍ ပြောပါသည်”ဟု သူ့ဆရာကြီးအား ပြောပြလေသော်…
ထိုအခါဆရာကြီးက…“သာဓု…သာဓု ဆရာကောင်းတပည့် ပီသစွာ ဖြေဆိုခဲ့ပါပေတယ်၊
အင်မတန် ထင်ရှားတဲ့ ကာယဒဏ်နှင့် နှိုင်းစာလျှင်
မနောဒဏ်ဟာ ဘာ ပြောပလောက်တော့မှာလဲ၊
မကောင်းမှု အကုသိုလ်ဖြစ်ဖို့ အရေးမှာ ကာယဒဏ် အပြစ်ကြီး သလောက် ၀စီ မနောဒဏ်များ အပြစ်မကြီးနိုင်ဟု (ထပ်မံ၍ ဒီဃတပဿီအဖြေကို အတည်ပြုသောအားဖြင့်) ပရိသတ်အား
ပြောပြလေသည်။ [သူတို့ကား “သူ့အသက် သတ်ခြင်းဟူသော ပါဏာတိပါတသည် စိတ်ဖြင့် ကြံစည်ရုံ
နှုတ်ဖြင့် ပြောနေရုံမျှဖြင့် အပြစ်မကြီးသေး, ကိုယ်ဖြင့် ထိထိရောက်ရောက် သတ်မှ အပြစ်
ကြီးသည်”ဟု ဆိုလိုသည်၊ ထိုအချက်ကို ဗုဒ္ဓနှင့် ဥပါလိ အတွေ့မှာ ရှင်းလင်းစေပါလိမ့်မည်။]
ဗုဒ္ဓကို နှိမ်ရန် ဥပါလိသူကြွယ်လာပုံ
ဥပါလိသူကြွယ်လည်း
ဒီဃတပဿီ၏ ပြောသောစကားကို အားရနှစ်သက်စွာ သာဓုခေါ်ပြီးလျှင်
“ဗုဒ္ဓ၏အထံသို့ အပြစ် တင်ဖို့ရန် ယခုပင် သွားမည်၊ ဒီဃတပဿီနှင့် အတည်ပြုခဲ့သည့် အတိုင်း
မနောဒဏ်ကို သာ၍အပြစ်ကြီးသည်ဟု အတည်ပြုပြန်လျှင် သိုးကလေးကို အမွေးကိုင်ပြီး (ဟိုလိုဆွဲ
သည်လိုဆွဲ) ဆွဲနေသလို အရှင်ဂေါတမကို မိမိဝါဒဖြင့် ဆွဲဆွဲပြီး မွှေ့လိုက်မည်”ဟု ပြောဆိုခွင့်
တောင်းရာ နာဋပုတ္တဆရာကြီးက “သွားပါလေ, အပြစ်တင်ချေပါ”ဟု ခွင့်ပြုသော်လည်း ဒီဃတပဿီကမူ
စဉ်းစားပြီးလျှင်…
“ကျုပ်တော့ ဥပါလိသွားမှာကို သဘောမတူဘူး၊ ရဟန်းဂေါတမ ဟာ သူတစ်ပါးကို
လှည့်ပတ်နိုင်တဲ့ မျက်လှည့်အတတ်ကို တတ်ထား တယ်၊ အဲဒီအတတ်ဖြင့် အခြားသူတို့ရဲ့ တပည့်များကို
လှည့်ပတ်လေ့ ရှိတယ်”ဟု ကန့်ကွက်လေရာ နာဋပုတ္တဆရာကြီးကမူ “ဥပါလိ သူကြယ်က ရှင်ဂေါတမတပည့်
ဖြစ်ဖို့ အကြောင်းမရှိပါ၊ ဖြစ်ခြင်း ဖြစ်လျှင် ရှင်ဂေါတမကသာ ဥပါလိတပည့် ဖြစ်စရာရှိပါတယ်၊
သွားသာ သွားပါ” ဟု ပြောဆိုလေသည်၊ ထိုအခါ
ဥပါလိသည် ဆရာကြီး၏စကားကို နားထောင်၍ ဆရာကြီးကို ဦးချပြီးလျှင် ဗုဒ္ဓရှင်တော်
သီတင်းသုံးရာ သရက်ဥယျာဉ်သို့ သွားလေသည်။
ဥပါလိ။ ။ (သင့်တော်သော နေရာ၌ ထိုင်ပြီးလျှင်) ဤအရပ်သို့
ဒီဃတပဿီနိဂဏ္ဌ ရောက်လာပါရဲ့လား။
ဗုဒ္ဓ။ ။ ရောက်လာပါရဲ့။
ဥပါလိ။ ။ စကားစမြည် ပြောလိုက်ပါရဲ့လား။
ဗုဒ္ဓ။ ။ ပြောလိုက်ပါရဲ့။
ဥပါလိ။ ။ ဘာများ ပြောကြပါသလဲ။
ဗုဒ္ဓ။ ။ (ဒီဃတပဿီနှင့် ပြောခဲ့သမျှ စကားတို့ကို
ပြန်၍) “ဒီဃတပဿီက ကာယဒဏ်ကို အပြစ်ကြီးသည်ဟု ယူ၍ ငါဘုရားက မနောဒဏ်ကို အပြစ်ကြီးသည်”ဟု
ယူကြောင်း မိန့်တော်မူသည်။
ဥပါလိ။ ။ ဒီဃတပဿီသည် ဆရာကောင်းတပည့်ပီပီ ဖြေဆိုနိုင်ပါပေတယ်၊
ကာယဒဏ်ကို ထောက်လျှင် မနောဒဏ်ဟာ ဘာပြောပလောက်မှာလဲ၊ ကာယဒဏ်သာ (ကိုယ်ဖြင့် ထိထိ ရောက်ရောက်
ပြုခြင်းသာ) အပြစ်ကြီးတော့မပေါ့။
ဗုဒ္ဓ။ ။ ဥပါလိ … မှန်တဲ့အချက်ပေါ်မှာ အတည်ဖြစ်ဖို့ရာ
ဆွေးနွေး ပြောဆိုမည်ဟု ကြံလျှင် ဤ ကာယနှင့် မနော နှစ်မျိုးသောအရာဝယ် “ဘယ်ဟာက အပြစ်ကြီးသည်”ဟု
စိစစ် နှီးနှော ပြောကြဖို့ပဲ။ (ဘာပဲပြောပြော, ငါတို့ အယူသာ အမှန်ဖြစ်စေရမည်ဟု စကားနိုင်လုလိုလျှင်
ပြောဆိုဆွေးနွေးဖို့မလိုတော့-ဟူလို။)
ဥပါလိ။ ။ အမှန်ပေါ်မှာ အတည်ဖြစ်ဖို့ ဆွေးနွေးလိုပါတယ်။
ဗုဒ္ဓ။ ။ [ နိဂဏ္ဌတို့ဝါဒ၀ယ် ရေအေး၌ အသက်ရှိသည်ဟု
ယူဆ၍ ရေအေးကို သောက်ချိုး သုံးစွဲလေ့ မရှိသည်ကို သိထားနှင့်ပါ၊] ဥပါလိ …“နိဂဏ္ဌတစ်ယောက်မှာ သည်းခြေရောဂါ ရောက်နေပြီ”ဆိုကြစို့၊
ရေအေးကို မသောက် မချိုးရလျှင် သူ့မှာ ရောဂါတိုးတော့မည်၊ စိတ်ကလည်း ရေအေးကို အလွန်တောင့်တ၏၊
သို့သော် “ရေအေးကို လိုချင်သည်”ဟု ပြောလျှင် ၀စီဒဏ်ထိုက်၍ ရေအေးကို သောက်ချိုးလျှင်
ကာယဒဏ်ထိုက်မည်စိုးသောကြောင့် အောင့်အည်း သည့်ခံနေရှာသည်၊ (သူတို့ အလိုအားဖြင့် တောင့်တမှု
မနောဒဏ်ကား ထိုက်နေလေပြီ၊) သူသည် ရေအေးကို မရသောကြောင့် ရောဂါတိုး၍ သေရလျှင် “မည်သည့်ဘ၀
ရောက်သည်”ဟု နိဂဏ္ဌဆရာတို့ အယူရှိကြသနည်း?။
ဥပါလိ။ ။ သူသည် ရေအေး အပေါ်၌ စိတ်စွဲလမ်း၍ သေရသောကြောင့် “မနောသတ္တ”
အမည်ရသော နတ်ဖြစ်သည်ဟု ပညတ်ကြပါသည်။ [မနော=စိတ်+သတ္တ=ငြိကပ်သူ။]
ဗုဒ္ဓ။ ။ ဥပါလိ … သတိထားပြီး ဖြေပါ၊ သင့်အဖြေဟာ ရှေ့နောက် အမြီးအမောက် မတဲ့ဘူး။ [“မနောဒဏ်ထက်
ကာယဒဏ်က သတ္တိထက်သည်”ဟု ဆိုခဲ့ပါလျက် စောင့်စည်းထားသော ကာယဒဏ်ရဲ့အကျိုးကို မခံစားရဘဲ
ပျက်စီးသော မနောဒဏ် ကပင် နတ်ဖြစ်အောင် အကျိုးပေးသည်ဟု ဆိုသောကြောင့် “ရှေ့ နောက် မညီ”ဟု
မိန့်တော်မူလိုသည်။]
ဥပါလိ။ ။ [ထိုသို့ မိန့်တော်မူလျှင်ပင် နဂို ပညာခံမနည်းသော
ဥပါလိသူကြွယ်သည် (မိန်းမောတွေဝေနေသူတို့ ကိုယ်လည်း မလှုပ်, နှုတ်လည်း မမြွက်ဘဲ စိတ်ရှိနေသေးသည့်အတွက်ကြောင့်သာ
အသက်ရှင်နေပုံကို သတိရကာ) မနောသည်သာ ကာယ ၀စီ တို့ထက် သာ၍ သတ္တိထက်ကြောင်းကို သဘောပေါက်လာတော့သည်၊
သို့သော် ဗုဒ္ဓ၏ ဆန်းကြယ်သော ပြဿနာတို့ကို ကြားနာလို သေးသဖြင့်] အရှင်ဘုရားက ဤသို့ ပြောသော်လည်း ကာယဒဏ်သာ ပို၍ သတ္တိထက်ပါတယ်။
ဗုဒ္ဓ။ ။ နိဂဏ္ဌနာဋပုတ္တဆရာသည် “သွားရင်း
လာရင်း နင်းမိသောကြောင့် ပိုးကောင် ကလေးတွေ သေလျှင် နင်းသူမှာ ဘယ်လို အပြစ်ရှိသည်”ဟု ပညတ်သလဲ။
ဥပါလိ။ ။ သေစေလိုသောစေတနာ မပါသောကြောင့် အပြစ်ကြီးသည်ဟု
မပညတ်ပါ။
ဗုဒ္ဓ။ ။ သေစေလိုသော စေတနာ ပါလာလျှင် ဘယ်လို ပညတ်သလဲ။
ဥပါလိ။ ။ စေတနာ ပါလာလျှင် အပြစ်ကြီးသည်ဟု ပညတ်ပါတယ်။
ဗုဒ္ဓ။ ။ စေတနာကို (ကာယ ၀စီ မနောသုံးမျိုးတွင်)
ဘယ်ထဲ သွင်းသလဲ။
ဥပါလိ။ ။ မနောဒဏ်ထဲ သွင်းပါတယ်။
ဗုဒ္ဓ။ ။ ဥပါလိ … သတိထားပြီး ဖြေပါ၊ သင့်စကားသည် ရှေ့နောက် မညီဘူး။ [“မနောထက် ကာယက သတ္တိထက်သည်”ဟု
ဆိုပါလျက် “မနောမပါသောအခါ ကာယဖြင့် နင်းမိ၍ သေသော်လည်း နင်းသူမှာ အပြစ်မရှိ, မနောပါမှ
အပြစ်ရှိသည်“ဟု ဆိုပြန်သဖြင့် မနောသာလျှင် သတ္တိထက်ကြောင်း, ဤရုပ်ကာယကြီးမှာ သူ့ချည်းသက်သက်
သတ္တိမရှိကြောင်းကို ၀န်ခံရာ ရောက်နေသဖြင့် ရှေ့နောက် မညီ”ဟု မိန့်တော်မူလိုသည်။]
ဥပါလိ။ ။ ဥပါလိသူကြွယ်လည်း ပြောရင်းပင် ငါတို့ဆရာကြီးသည်
“စေတနာမပါသောကံကို အပြစ်မရှိ၊ စေတနာပါသော ကံကို အပြစ်ကြီး၏”ဟု ပညတ်ပြီးလျှင် စေတနာကို
မနောဒဏ်၌ ထည့်သွင်းထား၏၊ “ဆရာကြီးရဲ့ စကားသည် ရှေ့နောက် မညီပါ တကား”ဟု သဘောပေါက်လာသည်၊
သို့ရာတွင် ဗုဒ္ဓ၏ ဆန်းကြယ်သော စကားကို နာခံလိုသေး၍ ကာယဒဏ်သည်သာ အပြစ်ကြီးကြောင်း လျှောက်ပြန်သည်။
ထိုအခါ ဗုဒ္ဓရှင်တော်မြတ်သည် တန်ခိုးဣဒ္ဓိပါဒ်ရှိသူတို့၏ စိတ်အစွမ်းကို
မိန့်တော်မူလေရာ ဥပါလိလည်း ထိုစိတ်၏ အစွမ်းများကို ၀န်ခံပြီးလျှင် ဗုဒ္ဓ၏ အယူဝါဒကို
အားရနှစ်သက်လှသဖြင့် “တပည့်တော်သည် ဘုရား တရား သံဃာကို ကိုးကွယ်ဆည်းကပ်ပါ၏၊ ယနေ့မှ
စ၍ အသက်ကို အပ်လျက် ဆည်းကပ်ကိုးကွယ်သော ဥပါသကာဟု မှတ်တော်မူရန်” လျှောက်လေသည်။
ဗုဒ္ဓ။ ။ ဥပါလိ…သင်တို့လို ထင်ရှားသော လူကြီးလူကောင်းဆိုတာ စိစိစစ်စစ်နှင့် နှိုင်းနှိုင်းချိန်ချိန် ပြုသင့်တယ်၊ ဥပါလိဆိုတဲ့ သူကြွယ်ဟာ တွေ့ရာကြုံရာ ကိုးကွယ်ဆည်းကပ်လေ့
ရှိတာပဲ””ဟု ပြောစရာ ဖြစ်တတ်တယ်။
ဥပါလိ။ ။ ဒီလိုသတိပေးတော်မူသည့်အတွက်ကြောင့် ရှင်တော်ဘုရားကို
သာ၍ အားရပါတယ် ဘုရား၊ အခြားဆရာကြီးတွေကား တပည့်တော်လို ဒကာတစ်ယောက် ရလျှင် နာဠန္ဒာ တစ်မြို့လုံး
အလံစိုက်၍ ကြွေးကြော်လေ့ရှိကြပါတယ်၊ ရှင်တော်မြတ်ဘုရားကတော့ စဉ်းစဉ်းစားစားနှင့် ပြုဖို့ရန်ပင်
သတိပေးတော်မူပါသေးတယ်၊ တပည့်တော်ကို နှစ်ကြိမ်မြောက် ဘုရား တရား သံဃာကို ဆည်းကပ်သူ”ဟူ၍
မှတ်တော်မူပါ။
ဗုဒ္ဓ ။ ဥပါလိ…သင်၏အိမ်သည် နိဂဏ္ဌတို့ အမြဲဝင်ရောက်
စားသောက်နိုင်သော ရေတွင်းလို ဖြစ်နေခဲ့တယ်၊ ထို့ကြောင့် ဗုဒ္ဓ ဓမ္မ သံဃာကို ဆည်းကပ် ကိုးကွယ်သော်
လည်း နိဂဏ္ဌိတို့ လာလျှင် ပေးလှူထိုက်သည်ဟု မှတ်ထားသင့်တယ်။
ဥပါလိ။ ။ ဒီစကားကို ကြားရသဖြင့် သာလွန်၍အားရပါတယ်၊
“ငါ့သာ လှူထိုက်တယ်, အခြားသူကို မလှူထိုက်၊ ငါ၏ သာဝကတို့ကိုသာ လှူထိုက်တယ်,အခြားသာဝကတို့ကို
မလှူထိုက်၊ ငါနှင့် ငါ၏သာဝကတို့ကို လှူမှ အကျိုးကြီးတယ်၊ အခြားသူများ လှူလို့ အကျိုးမကြီးဘူး”ဟု
ဟောလေ့ရှိကြောင်း ကြားရဖူးပါတယ်၊ ယခုတော့ နိဂဏ္ဌတို့ကို လှူဖို့ရန်ပင် အမိန့်ရှိနေပြန်ပါသေးတယ်၊
ဤစကားကို ကြားရသဖြင့် သာ၍ အားရပါသောကြောင့် သုံးကြိမ်မြောက် ဆည်းကပ်ကိုးကွယ်ပါသည်။
Credit to
No comments:
Post a Comment