အနာဂတ်သာသနာရေး အပိုင်း(၁) ဗုဒ္ဓကို ယုံကြပုံ

အနာဂတ်သာသနာရေး

၁။ ဗုဒ္ဓရတနာအခန်း

ဗုဒ္ဓံ သရဏံ ဂစ္ဆာမိ

ဗုဒ္ဓကို ယုံကြပုံ

ဗုဒ္ဓသာဝက ဥပါသကာ အမည်ခံသူတို့သည် ဗုဒ္ဓကို နည်းအမျိုးမျိုးဖြင့် ယုံကြ ကြည်ညိုကြ၏၊ ထိုသို့ ယုံကြ ကြည်ညိုကြရာ၌ ယုံတယ်ဆိုတာ ဘာလဲ၊ နှစ်ပေါင်း ၂၅၀၀ကျော်လောက်က အိန္ဒိယမြောက်ပိုင်း ကပိလဝတ္ထုပြည်၌ သာကိယဇာတ် အမျိုးအမြတ်ဆုံး ခတ္တိယမျိုး၌ဖြစ်သော သုဒ္ဓေါဒနမဟာရာဇာနှင့် မာယာဒေ၀ီတို့မှ ဖွားမြင်တော်မူပြီးလျှင် တစ်ဆယ့် ခြောက်နှစ်အရွယ်မှ စ၍ ယသော်ဓရာဒေ၀ီနှင့်အတူ ထီးနန်းစံနေတော်မူစဉ် ၂၉-နှစ် အရွယ်တော်ရောက်သောအခါ လူအို လူနာ လူသေနှင့် ရသေ့ရဟန်း ကို မြင်ရ၍ သံဝေဂဖြစ်တော်မူလေရာ ထိုနေ့ ညဥ့်မှာပင် တောထွက်၍ ရဟန်းပြုတော်မူသည်။

          ထို့နောက် ခြောက်နှစ်ပတ်လုံး “အပင်ပန်း အခဲယဉ်းဆုံး”ဟု ဆိုရသော အကျင့်ကို ကျင့်တော်မူလျက် ထိုအကျင့်ဖြင့် ထူးခြားသော တရားကို မရသောကြောင့် ခန္ဓာကိုယ် ပင်ပန်းအားကြီးသော ထို အကျင့်ကို စွန့်လွှတ်၍ (ပင်ပန်းသည်လည်း မဟုတ်, ခံစားမှုလည်း မပါ) “မဇ္ဈိမပဋိပဒါ”ခေါ် အလယ်အလတ်ကျင့်စဉ်ကို ကျင့်ခါမှ ထူးခြားသောတရားကို သိသော ပုဂ္ဂိုလ်တစ်ပါးသည် ဧကန်ဖြစ်ထွန်း ခဲ့ဖူးသည်ဟု ယုံခြင်း၊

         

“ထိုပုဂ္ဂိုလ်ထူးသည် ထိုအချိန်မှာ ကမ္ဘာလောက၌ မပေါ်သေး သော သစ္စာတရား, အနတ္တတရား, သံသရာလည်ပုံကို ပြသော ပဋိစ္စသမုပ္ပာဒ်တရား, ဗောဓိပက္ခိယတရား စသည်တို့ကို စထွင်၍ ဟောတော်မူခဲ့သည်”ဟု ယုံခြင်း၊

          “ထိုပုဂ္ဂိုလ်ထူးသည်  သိဖွယ်ဟူသမျှကို  (သတ္တ၀ါတို့အား  အကျိုး မများရာဝယ် အကုန်ထုတ်ဖော် မဟောပြခဲ့သော်လည်း) ကိုယ်တော်မြတ်စိတ်ထဲ၌ နက်နက်နဲနဲ ခွဲခွဲခြမ်းခြမ်း အားလုံးစုံအောင် သိတော်မူနိုင်သည်”ဟု ယုံခြင်း၊

          ဤသို့စသော ယုံခြင်းများသည် ဗုဒ္ဓအပေါ်၌ ယုံခြင်းဟု ခေါ်ရ သော သဒ္ဓါတစ်မျိုးပင်တည်း၊ (သိဖွယ်ဟူသမျှကို အားလုံးစုံအောင် သိသူကို  ပါဠိလို “ဗုဒ္ဓ” ဟု  ခေါ်သည်၊)  စာပေလိုက်စားသော နိုင်ငံခြားသား ခေတ်ပညာရှိတို့လည်း ဗုဒ္ဓ၏ တရားစာတို့ကို ကြည့်ရှု ခြင်း, ကျောက်စာဘက်ဌာနမှ ဗုဒ္ဓ၏အသုံးအဆောင်နှင့် သီတင်းသုံး တော်မူရာဌာနတို့ကို တွေ့ရှိရခြင်းတို့ကြောင့် ထိုအခါက “ဂေါတမဗုဒ္ဓ ဖြစ်ထွန်းခဲ့ဖူးသည်”ဟု ယုံကြပေသည်။

ဗုဒ္ဓကို အာရုံစူး၍   ကြည်နူးရပုံ

ကြည်ညိုဆိုတာ ဘာလဲ၊ ဗုဒ္ဓ၏ အကြောင်းအရာကို တွေး၍နေရသည်မှာ လွန်စွာ စိတ်ကြည်နူးဖွယ် ကောင်းလှ၏၊ ဗုဒ္ဓ၏ ၀ါဝင်းသော အသားအရေတော်, အဆက်အလက်ကျနသော ကိုယ်တော်, မေတ္တာသံ ကရုဏာသံ ပညာသံ ဆင်ခြင်တုံသံ အရှည်မျှော်သံတို့ကို အရင်းခံ၍ ထွက်ပေါ်လာသော သာယာနာပျော်ဖွယ် အသံတော်ကို ထိုအချိန်က  တိုက်ရိုက်  ဖူးမြော်လိုက်ရ,  ကြားနာလိုက်ရသူတို့ကို မဆိုထားဘိ ယခုအခါ တစ်ဆင့်ကြားဖြင့် မှန်းဆ၍ ဖူးမြော်ရသူ တို့ပင် မကောင်းစိတ် ညစ်ညူးစိတ် ကိလေသာရာဂစိတ်တွေ ကင်း၍ သန့်ရှင်းကြည်လင်သော စိတ်အစဉ်များ ဖြစ်လာရပေသည်၊ ဤသို့ ဘုရားကို အာရုံစူး၍ ကြည်နူးနေရခြင်းကို “ကြည်ညိုသော သဒ္ဓါ တစ်မျိုး”ဟု ဆိုရပေသည်။

ဘိက္ခုနီကလေးနှင့် အသန္ဓိမိတ္တာ

အခါတစ်ပါး၌ ဗုဒ္ဓရှင်တော် တရားဟောတော်မူစဉ်  ဘိက္ခုနီကလေးတစ်ယောက်သည် ဗုဒ္ဓ၏ သပ္ပာယ်သော  ရုပ်အဆင်း တော်ကို ဖူးမြော် ကြည်နူးနေရာမှ စိတ်အစဉ်တစ်မျိုး ပေါက်၍ “ငါသည်  ဘ၀များစွာ  ကျင်လည်ရာ၌  ဤ ယောက်ျားမြတ်၏ အလုပ်အကျွေးဖြစ်ခဲ့ရဖူးပါလေရဲ့လား”ဟု စဉ်းစားစိတ် ပေါ်ပေါက်လာလေသည်၊  ထိုဘိက္ခုနီသည် ဆဒ္ဒန္တဇာတ်တော်၌  စူဠသုဘဒ္ဒါ ဖြစ်ခဲ့ဖူးသူပင် ဖြစ်သည်။

          အသောက မဟာရာဇာ၏မိဖုရား အသန္ဓိမိတ္တာကား ဘုရား၏ အသံတော်သာယာကြောင်းကို ကြားနာရ၍ မောင်းမများနှင့်အတူ ထိုအသံနှင့် ဆင်တူယိုးမှားကောင်းသော ကရ၀ိတ်ငှက်အသံကို နာခံ ကြည့်ရာ လွန်စွာ ချိုမြသော ကရ၀ိတ်ငှက်အသံမှတစ်ဆင့် ဗုဒ္ဓ၏ အသံတော်ကို မှန်းမျှော်၍ အာရုံပြုနေရင်းပင် စိတ်အစဉ် လွန်စွာ ကြည်နူးရကား ထိုကြည်နူးနေသောစိတ်အစဉ်ကို အနိစ္စ,ဒုက္ခ,အနတ္တ ဟု ဆင်ခြင်နေခိုက်မှာ ကိုယ်လုပ်တော်များနှင့်အတူ သောတာပန် ဖြစ်လေသည်၊ ဤ၀တ္ထုများဖြင့် ဗုဒ္ဓအဆင်းတော်နှင့် အသံတော်၏ လွန်စွာ ကြည်နူးဖွယ်ကောင်းကြောင်းကို သိရပေသည်။

ပဏ္ဍိတ်နေရူးနှင့် ဗုဒ္ဓပုံတော်

          ဗုဒ္ဓအဆင်းတော်က ကြည့်ရှု ဖူးမြော်သူတို့ စိတ်အစဉ်ကို ကြည်လင် ရွှင်ပျစေနိုင်ပုံမှာ ပြောမယုံ ကြုံဖူးသူတို့မှ သိနိုင်ကြပေမည်၊ ဗုဒ္ဓသည် ရှုချင့်စဖွယ် သပ္ပာယ်ရုံမျှမဟုတ်, ထိုသပ္ပာယ်သော ရုပ်ပုံ တော်အတွင်း၌ သတ္တ၀ါတို့၏ အကျိုးကို နှစ်နှစ်ကာကာ လိုလား တော်မူသော မေတ္တာတော်နှင့် ကရုဏာ ပညာတော်တို့ကြောင့် မျက်နှာတော်သည် စန္ဒာလမင်းကဲ့သို့ ပ၀င်းရွှင်ပျ အေးမြတော်မူပေ သည်၊ 

ယခုအခါ  အိန္ဒိယတစ်တိုင်းလုံး  အလေးပြု အခံရဆုံး ခေါင်းဆောင်တစ်ယောက်ဖြစ်သော ပဏ္ဍိတ်နေရူးသည် ခပ်ရွယ်ရွယ် တုန်းက ကျန်းမာရေးအတွက် အနားယူရင်း သီဟိုဠ်ကျွန်းသို့ ဇနီးနှင့် အတူ သွား၍ ရှေးဟောင်း အဆောက်အအုံများကို လှည့်လည် ကြည့်ရှုလေသော် တစ်နေရာ၌ ဗုဒ္ဓပုံတော်ကို အထူးစိတ်ဝင်စားစွာ ကြည့်ရှု၍ မိမိတည်းခိုရာသို့ ရောက်သော်လည်း ထိုဗုဒ္ဓပုံတော်သည် မျက်စိထဲမှ မပျောက်နိုင်အောင်ပင် အာရုံစွဲ၍နေပါသတဲ့။

          ထိုသို့ စွဲနေကြောင်းကိုလည်း သီဟိုဠ်မိတ်ဆွေတို့အား ပြောပြခဲ့ သည်၊ အိန္ဒိယသို့ ပြန်ရောက်ပြီးနောက် နိုင်ငံရေးနှင့်စပ်၍ ထောင်ထဲသို့ ရောက်နေသည့်အခါ မိမိလုပ်လိုရာကို မလုပ်ရသဖြင့် စိတ် ညစ်ညစ်ရှိနေခိုက် (အဘိဓမ္မာသဘောအားဖြင့် ဒေါမနဿဖြစ်နေခိုက်မှာ) သီဟိုဠ်ကျွန်းမိတ်ဆွေအထံမှ ယခင်ကကြည်နူးစွာ ဖူးတွေ့ခဲ့ ရသော ဗုဒ္ဓပုံတော်ကို ဓာတ်ပုံရိုက်၍ ပို့လိုက်သောကြောင့် ထိုပုံတော် ကိုပင် စားပွဲပေါ်တင်၍ ဖူးမြင်နေရခြင်းဖြင့် ညစ်ညူးသောစိတ်ကို ကြည်နူးစေခဲ့သည်ဟု သူ၏အတ္ထုပ္ပတ္တိ၌ ထည့်သွင်းပြထားသတတ်၊ 

ဤသို့လျှင် သက်တော်ထင်ရှား ဗုဒ္ဓကို မဆိုထားဘိ, ဗုဒ္ဓပုံတော်အတုသည်ပင် ပညာရှင်တို့၏စိတ်ကို ဤမျှလောက်ပင် ကြည်လင်လာစေ နိုင်ပေသေး၏၊ သက်တော်ထင်ရှား ဗုဒ္ဓရှင်တော်ဘုရားသည်ကား မည်မျှအထိ ကြည်လင်စေနိုင်လိမ့်မည်ဟု မှန်းဆသင့်တော့သည်၊ 

ထိုသို့ ကြည်လင်လာသောအခါ အနည်တွေ အောက်သို့ ထိုင်နေ သော ရေသည် ကြည်လင်နေသကဲ့သို့ တဏှာ ရာဂ မာန ဒေါသ ဒေါမနဿ စသော စိတ်ညစ်မှုတွေ ကင်း၍ စိတ်အစဉ်လည်း သန့်ရှင်း ကြည်လင်နေတော့၏၊ ထိုသို့ ကြည်လင်နေမှု, ကြည်နေမှုကို “ကြည်”သဒ္ဓါဟု ဆိုလိုပါသည်။

 

Copy from
  Yanan Sanein အချိန် 7:39 AM