ဉာဏ်(၄)မျိုး
ထို့ကြောင့်
အတ္တစွဲလမ်းချက်ကို ဖျောက်၍ အနတ္တချည်းဟု သဘောပေါက်ဖို့ရာ ယခုအခါဝယ် ပဋိစ္စ သမုပ္ပာဒ်တရားတော်ကြီးကို
အကျဉ်းချုပ်မျှ ပြပါတော့မည်၊ ထိုသို့ ပြရာဝယ် သတ္တ၀ါတို့ သန္တာန်၌ သုတမယဉာဏ်, စိန္တာမယဉာဏ်,
ဘာဝနာမယဉာဏ်, ပဋိဝေဓဉာဏ်ဟု လေးမျိုးရှိရာ မိမိမှာရှိသော သုတမယဉာဏ်, စိန္တာမယဉာဏ်လောက်ဖြင့်သာ
ပြနိုင်ပါသည်။
ချဲ့ဦးအံ့… စာပေ လိုက်စား၍ ရရှိသော အသိဉာဏ်သည် “သုတ
မယဉာဏ်” မည်၏၊ [သုတ-ကြားနာ ကြုံတွေ့အပ်သော စာပေ စသည်ကြောင့် + မယ-ဖြစ်သောဉာဏ်၊] ထိုသုတမယဉာဏ်ကို
အခြေခံ၍ ကြံစည်ခြင်းကြောင့်ဖြစ်စေ, သုတမပါဘဲ သက်သက် တွေးတောကြံစည်ခြင်းကြောင့်ဖြစ်စေ
တိုးတက်နားလည်သောဉာဏ်သည် စိန္တာမယဉာဏ်မည်၏၊ ကမ္မဋ္ဌာန်း ပွားများခြင်းကြောင့်ဖြစ်သော ဉာဏ်သည်
စိန္တာမယဉာဏ်ထက် သာလွန်ထက်မြက်၏၊ ထို ဉာဏ်ကို “ဘာဝနာမယဉာဏ်”ဟု ခေါ်၏၊ ထိုဘာဝနာမယဉာဏ်ကို
အခြေခံ၍ ထိုးထွင်းသိမြင်သောဉာဏ်သည် ပဋိဝေဓ (မဂ်)ဉာဏ်မည်၏။
ဤသို့ အဆင့်ဆင့် ဉာဏ်လေးမျိုး ရှိရာဝယ် ဘုန်းကြီးမှာရှိသော ဉာဏ်သည်
ဒုတိယအဆင့်လောက်သာ ရောက်သော စိန္တာမယ ဉာဏ်မျိုးမျှ ဖြစ်၍ ပဋိစ္စသမုပ္ပာဒ်တရားတော် ဆိုင်ရာ၌
အကုန်အစင် မသိသေးချေ၊ သို့သော် အဘိဓမ္မာတရားတော်ကို ဆရာသမားအထံမှ လည်းကောင်း, ဤကျမ်းစာတို့မှလည်းကောင်း
ကောင်းကောင်း နားလည်ပြီး ဖြစ်ရကား ကံနှင့် ကံ၏ အကျိုးကို ပိုင်ပိုင်နိုင်နိုင် နားလည်ပြီးဖြစ်ပါသည်။
ထို့ပြင် ကျမ်းစာများကို လေ့လာမှု, အထူးအားဖြင့် အနတ္တ လက္ခဏသုတ်တော်ကဲ့သို့သော
သုတ္တန်တရားများနှင့် အဘိဓမ္မာ တရားတော်ကို လေ့လာမှုတို့ကြောင့် သတ္တ၀ါတို့ကိုယ်အတွင်း၌
အတ္တမရှိကြောင်းကိုလည်းကောင်း, ကမ္ဘာကို ဖန်ဆင်းနိုင်သော ပရမအတ္တ ဗြဟ္မာမင်း မရှိကြောင်းကိုလည်းကောင်း
သဘောပေါက် ပြီး ဖြစ်ရကား မိမိစိတ်၌ ရှင်းပြီးသမျှကိုသာ တစ်ဆင့် နားလည်အောင် ရှင်းပြပါမည်။
ပဋိစ္စသမုပ္ပာဒ်ပါဠိတော်
အ၀ိဇ္ဇာပစ္စယာ သင်္ခါရာ၊
သင်္ခါရပစ္စယာ ၀ိညာဏံ၊ ၀ိညာဏပစ္စယာ နာမရူပံ၊ နာရူပပစ္စယာ သဠာယတနံ၊ သဠာယတနပစ္စယာ ဖေဿာ၊
ဖဿပစ္စယာ ဝေဒနာ၊ ဝေဒနာပစ္စယာ တဏှာ၊ တဏှာပစ္စယာ ဥပါဒါနံ၊ ဥပါဒါနပစ္စယာ ဘဝေါ၊ ဘ၀ပစ္စယာ ဇာတိ၊
ဇာတိပစ္စယာ ဇရာမရဏသောကပရိဒေ၀ဒုက္ခဒေါမနဿုပါယာသာ
သမ္ဘ၀န္တိ၊ ဧ၀မေတဿ ကေ၀လဿ ဒုက္ခက္ခန္ဓဿ သမုဒယော ဟောတိ။
ပါဠိတော်မြန်မာပြန်
မသိမှုကြောင့်
ပြုလုပ်မှုတွေ ဖြစ်ကြ၏၊ ပြုလုပ်မှုကြောင့် အကျိုးဝိညာဉ် ဖြစ်ရ၏၊ ၀ိညာဉ်ကြောင့် နာမ်ရုပ်
ဖြစ်ရ၏၊ နာမ်ရုပ်ကြောင့် အာယတနခြောက်ပါး ဖြစ်ရ၏၊ အာယတနခြောက်ပါးကြောင့်
ဖဿ ဖြစ်ရ၏၊ ဖဿကြောင့် ဝေဒနာ ဖြစ်ရ၏၊ ဝေဒနာကြောင့် တဏှာ ဖြစ်ရ၏၊ တဏှာကြောင့် ဥပါဒါန်
ဖြစ်ရ၏၊ ဥပါဒါန်ကြောင့် ဘ၀ ဖြစ်ရ၏၊ ဘ၀ကြောင့်
ဇာတိ ဖြစ်ရ၏၊ ဇာတိကြောင့် ဇရာ မရဏလည်း ဖြစ်ရ၏၊ ၀မ်းနည်းမှု, ငိုကြွေးမှု, ကိုယ်ဆင်းရဲမှု,
စိတ်ဆင်းရဲမှု, ပြင်းစွာ ပင်ပန်းမှုတို့လည်း
ဖြစ်ကြရ၏။
ဤသို့ သုခမဖက် သက်သက် ဒုက္ခဖြစ်သော ရုပ်နာမ်အစု၏သာ ဖြစ်နေပုံ ထင်ရှားလေသည်။
No comments:
Post a Comment