အဂ္ဂမဟာပဏ္ဍိတ အရှင်နန္ဒမာလာဘိဝံသ (Ph.D) အဘိဓမ္မာ မြတ်ဒေသနာ (ပထမတွဲ)
ဒါကြောင့် ‘ဓမ္မ’ ကို သုတ္တန္တဓမ္မနဲ့ အဘိဓမ္မရယ်လို့ နှစ်မျိုးခွဲလိုက်ပြီး ဘုရားရှင် ဟောတော်မူခဲ့တဲ့ ‘ဓမ္မ’ နဲ့ ‘၀ိနယ’ ကို ၀ိနယရယ်, သုတ္တန္တရယ်, အဘိဓမ္မာရယ်လို့ ၃-မျိုး ခွဲလိုက်တဲ့ အခါကျတော့ ဒါကို ပိဋကတ် ၃-ပုံလို့ ခေါ်ကြတယ်။
‘ပိဋက’ ဆိုတဲ့ စကားလုံးကို အများသိနေကြတာတော့ ‘ခြင်းတောင်း’ ဆိုတဲ့ အဓိပ္ပာယ်ပဲ၊ အင်္ဂလိပ်လို ပြန်ဆိုတဲ့အခါ Basket လို့ ပြန်ကြတယ်၊ အဲဒီတော့ ပိဋကတ် သုံးပုံကို Three Basket လို့ ပြန်လေ့ရှိတယ်၊ သို့သော် ‘ပိဋက’ ဆိုတာ ခြင်းတောင်း လို့သာ အဓိပ္ပာယ်ရတာ မဟုတ်ဘူး၊ ‘သင်ယူရမယ့်ကျမ်းစာ’ ကိုလည်း ပိဋကသဒ္ဒါက ဟောတယ်၊ ဒါကြောင့်မို့ တခြားနည်းနဲ့လည်း အင်္ဂလိပ်လို ဘာသာပြန်ဖို့သင့်တယ်ပေါ့၊ ပိဋကဆိုတာ သင်ယူရမယ့်ကျမ်းးစာ (Text to be learned) လို့ အဓိပ္ပာယ် ရတယ်။
အဲဒီ သင်ယူရမယ့် ကျမ်းစာ သုံးမျိုးသုံးစား ခွဲထားတယ်၊ သံဃာအဖွဲ့အစည်း လိုက်နာရန် စည်းမျဉ်း စည်းကမ်းတွေ အနေနဲ့ ဟောထားတာက ‘၀ိနယ’၊ သဘာဝတရားတွေကို လောကဝေါဟာရတွေနဲ့ တင်ပြီးတော့ လုပ်သင့်, မလုပ်သင့်၊ ဘယ်အရာကို လုပ်သင့်တယ်၊ ဘယ်အရာဟာ မလုပ်သင့်ဘူး စသည်ဖြင့် လုပ်သင့်, မလုပ်သင့် နည်းဥပဒေတွေ ပေးပြီးတော့ ဟောတာက “သုတ္တန္တ” ။
‘အဘိဓမ္မာ’ ကျတော့ လုပ်သင့်, မလုပ်သင့် ဆိုတာကို မပြောတော့ဘူး၊ သဘာဝတရားတွေဟာ ဆိုင်ရာ အကြောင်းတရားတွေမှီပြီးတော့ ဘယ်ပုံဘယ်နည်း ဖြစ်ပေါ်နေတယ် ဆိုတာကိုသာ ဟောတယ်၊ သဘာဝတရားသက်သက် ရှင်းလင်း ဟောပြောတာက အဘိဓမ္မာ၊ အဘိဓမ္မာကို ပုဂ္ဂိုလ်နဲ့ ဆက်စပ်ပြီးတော့ မဟောဘူး၊ သဘာဝတရားသက်သက်ကို ဟောတယ်။
ဓမ္မ ၂-မျိုးအထူး
သုတ္တန်ဆိုတာ ပုဂ္ဂိုလ်နဲ့ ဆက်စပ်ပြီးတော့ ဟောတယ်၊ အဘိဓမ္မာကျတော့ သဘာဝတရားသက်သက်ကို ဟောတယ်လို့ သဘာဝတရားနဲ့ ပုဂ္ဂိုလ်ကို ခွဲထားလိုက်တယ်၊ တစ်နည်းအားဖြင့် ပြောရမယ်ဆိုရင် သုတ္တန်ဆိုတာ ဝေါဟာရ ဒေသနာ၊ လူ့လောကမှာ လူတွေ နေ့စဉ် သုံးစွဲနေတဲ့ စကားလုံးတွေကို အသုံးပြုတယ်၊ ဒါကလုပ်သင့်တယ်၊ ဒါက မလုပ်သင့်ဘူး၊ ဒါက ရှောင်ရမယ်၊ ဒါက ဆောင်ရမယ် စသည်ဖြင့် ဆောင်ရန်၊ ရှောင်ရန်၊ လုပ်သင့် မလုပ်သင့် ခွဲခြားပြီးတော့ ဟောပြောသွားတာ၊ ဒါက သုတ္တန်တရားတဲ့။
‘အဘိဓမ္မာ’ တရားကျတော့ သတ္တ၀ါဆိုတဲ့ အသုံးအနှုံးတွေ ဖယ်ရှားပြီးတော့ လူ့လောက နေ့စဉ် ပြောနေတဲ့ စကားလုံးတွေကို ကျော်လွှားလို့ အတွင်းအနှစ်သာရ ပရမတ္ထ ထိအောင်၊ တကယ့် အနှစ်သာရ ပရမတ္ထထိအောင်၊ တကယ့် အနှစ်သာရပိုင်းကို ထိရောက်အောင် ဟောတာဖြစ်တယ်၊ အမှန်တရားကို ထိတွေ့ပြီးတော့ သတ္တ၀ါဆိုတဲ့ ဝေါဟာရ ရှောင်ရှားပြီး ဟောထားတဲ့အတွက် ပရမတ္ထဒေသနာလို့ ခေါ်တယ်။
နောက်တစ်ခါ သုတ္တန်တရားကလည်း သတ္တ၀ါတွေကို ဆုံးမတာပဲ၊ အဘိဓမ္မာကလည်း ဆုံးမတာပဲ၊ ဒါပေမယ့် ဆုံးမပုံချင်းမတူကြဘူး၊ သုတ္တန်တရားက သတ္တ၀ါကို ဆုံးမတဲ့အခါကျတော့ ဘယ်ပုံဘယ်နည်း ဆုံးမတုန်းဆိုတော့ အကြောင်းအကျိုး၊ အကောင်းအဆိုး၊ လိုက်နာရမယ့် ကျင့်ဝတ်၊ ရှောင်ကြဉ်ရမယ့်အရာ၊ သတ္တ၀ါတွေရဲ့ စရိုက်ကိုကြည့်ပြီး ဒီပုဂ္ဂိုလ်ကျတော့ ဟိုလိုပြောမှ ဖြစ်မယ်လို့ ပုဂ္ဂိုလ်အလိုက် ဆုံးမတာမျိုး ဖြစ်တယ်။
ဆိုပါစို့၊ ‘၀က္ကလိ’ လို ပုဂ္ဂိုလ်မျိုးကိုကြည့် ၊ ၀က္ကလိ ဆိုတာ မြတ်စွာဘုရားရဲ့ ရုပ်အဆင်းပေါ်မှာ တန်းတန်းစွဲဖြစ်နေတဲ့ ပုဂ္ဂိုလ်၊ ဘုရားက အလွန်တရာ သပ္ပါယ်နေသည့် အတွက်ကြောင့် မြတ်စွာဘုရားရဲ့ ရုပ်အဆင်းကို ဖူးနေတာသည်ပင်လျှင် သူ့အတွက်မှာ တန်ဘိုး ရှိလှပြီဆိုပြီး မြတ်စွာဘုရားရဲ့ သပ္ပါယ်လှတဲ့ ရုပ်အဆင်းပေါ်မှာ စွဲမက်ပြီးတော့ နေတယ်။
ဒီ ၀က္ကလိလို ပုဂ္ဂိုလ်များကျတော့ မြတ်စွာဘုရားက -----
“ ကိံ တေ ၀က္ကလိ၊ ဣမိနာ ပုတိကာယေန ဒိဋ္ဌေန - ဟောဒီ အပုပ်အစပ်တွေ ရှိနေတဲ့ ခန္ဓာကြီးကို ကြည့်လို့ ဘာအကျိုးရှိမှာလဲ ၀က္ကလိ” လို့ ဟောတော်မူခဲ့တယ်။
‘ ယော ဓမ္မံ ပဿတိ၊ သော မံ ပဿတိ - ဓမ္မမြင်မှ ငါ့ကို မြင်မှာ၊ ငါ့ကို ကြည့်နေလို့ အပိုပဲလို့ မိန့်တော်မူတယ်၊
အဲဒီလို သတ္တ၀ါတွေရဲ့ စရိုက်ကို ကြည့်ပြီးတော့ ဟောတာ၊ ဒီပုဂ္ဂိုလ်က ဒီတရားနဲ့ တန်တယ်၊ ဟိုပုဂ္ဂိုလ်ကကျတော့ ဟိုတရားနဲ့တန်တယ် ဆိုပြီးတော့ အခြေခံ အလိုက် မြတ်စွာဘုရားက ဟောသွားတာ၊ အဲဒါကို ယထာနုလောမသာသနာ လို့ခေါ်တယ်၊ သူ့တန်ရာ တန်ရာ သင့်တော်ရာ သင့်တော်ရာ ရွေးချယ်ပြီး ဟောပြောတဲ့ တရားမျိုးဟာ သုတ္တန်တရားပဲ။
အဘိဓမ္မကျတော့ အဲဒီလို မဟုတ်ဘူး၊ သဘာဝတရားရှိတာကို အရှိအတိုင်း ဟောလိုက်တယ်၊ သဘာဝတရား အရှိကို အရှိအတိုင်း ဟောပြီးတော့ ဆုံးမတဲ့ တရားမျိုး ဖြစ်တာကြောင့် ယထာဓမ္မ သာသနာ - ဓမ္မအတိုင်း ဆုံးမတဲ့ အဆုံးအမလို့ ဒီလိုခေါ်တယ်၊ အဲတော့ တစ်ခုနဲ့ တစ်ခု မတူကြဘူးပေါ့၊ အဘိဓမ္မာဒေသနာဆိုတာ အင်မတန်မှ ထူးခြားတယ်လို့ ပြောရမယ်။
*ဆက်ရန်* -------
ဆရာတော်ကြီးဟောကြားတော်မူသော အဘိဓမ္မာမြတ်ဒေသနာ (ပထမတွဲ) မှ
{ တရားဦးအစ သုတ္တန်က နှင့် ဘုရားဖြစ်အောင် ကျင့်ကြံအားထုတ်တော်မူပုံ } အား ဆက်လက်ရေးသား ပူဇော်ပါမည်။
အဂ္ဂမဟာပဏ္ဍိတ အရှင်နန္ဒမာလာဘိဝံသ (Ph.D)
အဘိဓမ္မာ မြတ်ဒေသနာ (ပထမတွဲ) စာ ၄- ၇ မှ ကောက်နှုတ်ရေးသား ပူဇော်ပါသည်။
ဤစာဖြင့် ဗုဒ္ဓရှင်တော်မြတ်ဘုရား အား လည်းကောင်း
အဂ္ဂမဟာပဏ္ဍိတ အရှင်နန္ဒမာလာဘိဝံသ (Ph.D) ဆရာတော် အား လည်းကောင်း
ကျနော့်အား ယခုစာအုပ်ကို ဓမ္မလက်ဆောင်ပေးသော အန်တီဆွေ (Anatta Swe) တို့အား ရှစ်ခိုးပူဇော်ပါသည်။
ရဲဝင်းထွန်း
06.01.2012 (Friday) 10:00 am
No comments:
Post a Comment