ကြောက်၍တစ်ပါးတည်းနေသော ဆရာတော်
သာလွန်မင်းတရားကြီး
လက်ထက်ဝယ် ၀ိနည်း ပါဠိတော် အဋ္ဌကထာ နိဿယများကို
“အရှင်ဇမ္ဗုဓဇ” မည်သော ရွှေဥမင်ဆရာတော်နှင့် တောင်ဖီလာဆရာတော်တို့ စီရင်တော်မူကြ၏၊ အခါတစ်ပါး၌
တောင်ဖီလာဆရာတော်သည် နိဿယချင်း တိုက်ဆိုင်လို၍ ပုခန်း သာဂရ၀က်ကျ ဥမင်၌ တောရကျင့်သော
ရွှေဥမင်ဆရာတော် အထံသို့ အခြွေအရံ လှူဖွယ်များဖြင့် ကြွလာ၏၊ အလုပ်အကျွေး ဖိုးသူတော်
တစ်ယောက်သာ ရှိသော ရွှေဥမင်ဆရာတော်သည် မင်းဆရာအတွက် ခင်းပေးစရာ ဘာမျှ မရှိသောကြောင့်
မိမိသုံးစွဲ နေကျဖြစ်သော စမ္မခဏ် (သားရေနယ်)ကို ခါ၍ ခင်းပေးရလေ သတတ်၊ ပညာရှိ သူတော်ကောင်းကြီး
နှစ်ပါးတို့ အားရ၀မ်းသာ နှုတ်ခွန်းဆက်သ ပြီးသောအခါ မင်းဆရာတော်က “ပရိသတ်ခြွေရံ နည်းပါးလှပါသည်,
ကြောက်တော်မမူပါလား”ဟု မေးလျှောက်ရာ “ကြောက်သောကြောင့် ပရိသတ် နည်းနည်းနှင့် နေပါသည်”ဟု
ပြန်ပြောလေသည်။
ထိုအခါ “သြော်…ငါကား ပရိသတ်အများနှင့် နေသူ ဖြစ်၍ သံသရာအရေးကိုတွေးကာ
မကြောက်ရာရောက်ချေပေါ့”ဟု သံဝေဂ ဖြစ်တော်မူ၏၊ ထို့နောက် နိဿယချင်း တိုက်ဆိုင် ရှုကြည့်သောအခါ
မင်းဆရာနိဿယသည် ကျယ်ဝန်း၍ ရွှေဥမင်နိဿယသည် ကျဉ်းသောကြောင့် “နောင်လာ နောက်သားတို့အတွက်
အကျဉ်းဖြင့်သာ တော်လောက်ပြီ”ဟု ယူဆ၍ မိမိနိဿယကို စေတီပြင်မှာ မီးပူဇော်လေသည်၊ ပြန်လာသောအခါ
ရခဲ့သောသတိသံဝေဂကြောင့် နေရင်း ဖြစ်သော စစ်ကိုင်း လေးထပ်ကျောင်းတော်ကြီးသို့ မ၀င်တော့ဘဲ
တောင်ဖီလာတောရသို့ ကြွ၍ တောထွက်တော်မူပါသတဲ့။ [အလွန် အတုယူဖွယ်ကောင်းသော သူတော်ကောင်းကြီးများ
ဖြစ်ကြပါပေသည်။]
အခမ်းအနားမကြိုက်သော ဆရာတော်
သာသနာပိုင်စရစ်ဆရာတော်ပျံလွန်
တော်မူ၍ တူတော်ဖြစ်သော အရှင်သာပုံကို သာသနာပိုင်တင်လေရာ ထိုသာသနာပိုင်သည် ငယ်ရွယ်သူဖြစ်၍
ဂုဏ်ပကာသန လိုလားဟန် တူ၏၊ အခါတစ်ပါး၌ ဆွမ်းခံဝင်လာသောအခါ သိုင်းကိုင်သူ အခြံ အရံဖြင့်
ဝင်သည်ကို ကြက်သွန်ခင်းဆရာတော်ကြီးနှင့်တွေ့၍ “ဟဲ့ သာပုံ… ဒီနှင်တံ (တုတ်)လောက်ဖြင့်
နင့်ကို ကြောက်မည်တဲ့လား၊ ကြောက်လောက်အောင် အမြောက်ဆောင်၍ ဆွမ်းခံဝင်”ဟု မိန့်တော်မူလေသည်၊
ထိုသာသနာပိုင်လည်း အရှက်ရ၍ ၀န်ချလေ၏၊ မကြာခင် ပျံလွန်တော်မူလေရာ တိလောကဂုရုဆရာတော်ကို
သာသနာပိုင် တင်လေသည်၊ ဤကြက်သွန်ခင်းဆရာတော်ကား ခမ်းခမ်းနားနား ဟန်ကြီးပန်ကြီး လုပ်သည်ကို
နှစ်သက်တော်မူဟန် မတူ၊ စရစ်ဆရာတော်တို့၏ ပထမစာတော်ပြန် အခမ်းအနားပွဲကိုလည်း (တစ်ပါးနှင့်တစ်ပါး
အပြိုင်အဆိုင် ပြန်ကြရလေသောကြောင့်) “စရစ်…နင်တို့လက်ဝှေ့ပွဲ မပြီးသေးဘူးလား”ဟု မိန့်တော်မူသတတ်။
ရှေးဆရာတော်များ ကျင့်တော်မူကြပုံ
နံမော်ဆရာတော် အရှင်သာရမဉ္ဇူသည် ၀ိနည်းကို လေးစားတော်မူ၏၊ အခါတစ်ပါး၌
ကိုယ်တော်၏ ဇာတိ (ဖွားမြင်ရာ) ဖြစ်သော မိတ္ထိလာ အုတ်ရှစ်ကုန်းသို့ ကြွတော်မူရာ ခရီးပန်းမည်စိုး၍
ရွာက လှည်းအကြိုလာသော် “မသွားနိုင်မှ ငါပြောမည်”ဟု မိန့်တော်မူ၍ ရွာသို့ ရောက်တော်မူသည့်တိုင်အောင်
လှည်းစီးတော်မမူ၊ [ သွားနိုင်သေးလျှင် နွားလှည်း, မြင်းလှည်း, လူဆွဲယာဉ် (လန်ချား)
အားလုံးပင် မစီးကောင်း၊ မသွားနိုင်လျှင် နွားထီး စသော အထီးတပ်သည့် လှည်းစသည်ကို စီးကောင်း၏။]
ဒုတိယ နံမော်ဆရာတော် အရှင်ဓမ္မပါလလည်း မိုးမရွာလျှင် မည်သည့်အခါမျှ
ထီးဆောင်းတော်မမူ၊ မိုးရွာ၍ ဆောင်းခွင့် ကြုံလာလျှင် သူတစ်ပါးကို မိုးမစိုစေဘဲ ကိုယ်တိုင်
ဆောင်းတော်မူ၏၊ အသုံးအဆောင် အလှအပ အယဉ်အကျေးများကို သုံးစွဲတော်မမူ၊ နေရာခင်းလည်း
(စမ္မခဏ်ခေါ်) သားရေပိုင်းအပြင် မရှိ၊ ညဥ့်အခါ ပါတိမောက်နှစ်စောင်, အဂ္ဂိက္ခန္ဓောပမသုတ်,
ခုဒ္ဒသိက္ခာကို မပြန်ဘဲ မအိပ်၊ နံနက်အခါလည်း ဘာဝနာပွားမှု မပျက်၊ စကား အပြော ကျွမ်းကျင်တော်မူလှ၏၊
ကျန်းဂန်တို့ကိုလည်း ဆရာကောင်းများ၏ အထံချည်း သင်ခဲ့ရလေသည်။
သီလ၀ိသောဓနီကျမ်းပြုဆရာတော်၏ ဆရာဖြစ်သော အရှင်အဂ္ဂဓမ္မနှင့် အရှင်သာရဓမ္မတို့လည်း
ဝိနည်းကို ရိုသေတော်မူကြ၏၊ သင်္ကန်းမရုံ ဖိနပ်မချွတ်ဘဲ မြို့ရွာတွင်းသို့ ၀င်လေ့မရှိကြ၊
ထိုခေတ်က ဆင်တဲဆရာတော်ဘုရားကြီးသည် အော့အန်၍ အနံ့ကို ပယ်ခြင်းငှာ ကွမ်းရွက် တောင်းသည်ကို
ထုံး ရှားစေး ကွမ်းသီးအစုံနှင့် ကပ္ပိယက ကပ်သောကြောင့် “နေလွဲပြီ မဟုတ်လော၊ ကွမ်းရွက်ချည်းပေး”ဟု
ခပ်မာမာ မိန့်တော်မူသည်၊ ထိုဆရာတော် အစဉ်အဆက်များသည် မိုးမရွာလျှင် ထီးကိုလည်း ဆောင်းတော်မမူကြ။
အရှင်ဝရဓမ္မကား ရသမျှပစ္စည်းကို ကိုယ်ပိုင်ဟု အမှတ်မထား၊ ကိုယ်သုံးလောက်ရုံသာယူ၍
သံဃိကချည်း ပြုလုပ်ထား၏၊ တောင်လေးလုံးဆရာတော်ကား ရသမျှကို စွန့်လှူဖို့ချည်း သဘောထား၏၊
မင်းရွာဆရာတော်နှင့် ဆုံတားဆရာတော်များလည်း ထို့အတူပင်တည်း၊ မောင်းထောင်ဆရာတော်, မဲဓီးဆရာတော်များလည်း
ဝိနည်းသိက္ခာကို ရိုသေတော်မူကြ၏၊ တပည့်တပန်း ချီးမြှောက်မှုလည်း အထူးထင်ရှားတော်မူကြပေသည်၊
ထိုဆရာတော်ကြီးများသည် နိသဂ္ဂိယပါစိတ်၌ လာသော ရာဇဘောဂ္ဂသိက္ခာပုဒ်, ဇာတရူပရဇတ သိက္ခာပုဒ်,
ကယ၀ိက္ကယသိက္ခာပုဒ် စသည်တို့ကို အထူးစောင့်ထိန်း တော်မူကြသဖြင့် ရွှေ ငွေ စသော ပစ္စည်းကို
မခံယူကြပေ။
အရှင်သာရဓမ္မဆရာတော်သည် စာရေးဖို့ရာ ပေရွက်ကို အလိုရှိ၍ မိမိမှာရှိသော
ဖျင်အ၀တ်ဖြင့် ရဟန်းတစ်ပါးကို အလဲခိုင်းရာ ထိုရဟန်းက အဖိုးဆစ်မိသောကြောင့် ရလာသောပေကို
စွန့်ပစ်စေလေသည်၊ [ ရဟန်းများသည် ကပ္ပိယနှင့်အတူ ဈေးဝယ်သွားသော အခါ ရဟန်းက မဆစ်ရ၊ ကပ္ပိယဘာသာဆစ်၍
ဝယ်မှအပ်သည်၊၊] ပေ၌ ရေးဖို့ရန် စာရေးငှားသောအခါလည်း ကိုယ်တိုင်မငှားဘဲ လူကပ္ပိယကိုသာ
အငှားခိုင်းတော်မူသည်။
ဤသို့လျှင် အင်းဝခေတ်၌ ပရိယတ် ပဋိပတ် စွယ်စုံပေါက်၍ မုံသောက်ဇာနည်
မဟာထေရ်တို့ ရှိတော်မူကြခြင်းသည် ထိုခေတ် ဗုဒ္ဓသာဝက ဒကာ ဒကာမတို့အတွက် လှူဒါန်းသမျှ
အကျိုးရဖို့ အကြောင်း ကံကောင်းကြပါပေသည်၊ ယခုခေတ်၌လည်း ဤကဲ့သို့ ပုဂ္ဂိုလ်များ ရှိကြပါသေး၏၊
သို့သော် ထိုပုဂ္ဂိုလ်များသည် ရပ်ရွာ နယ်ပယ် အနည်းငယ် လူများ၏ ကိုးကွယ်ရာ အဖြစ်ဖြင့်
အေးအေး သီတင်းသုံးတော်မူကြပေသည်။
No comments:
Post a Comment