အနာဂတ်သာသနာရေး အပိုင်း(၇၉) ဖဿကြောင့် ဝေဒနာဖြစ်ပုံ

ဖဿကြောင့် ဝေဒနာဖြစ်ပုံ

ခံစားမှုကို “ဝေဒနာ”ဟု ခေါ်၏၊ တကယ်ကောင်းသည် ဖြစ်စေ, မကောင်းသည်ဖြစ်စေ မျိုးရိုးအလိုက် (သို့မဟုတ်) မိမိစိတ်အကြိုက် အားဖြင့် အကောင်းဟု ထင်နေသော အာရုံနှင့် တွေ့သောအခါ သာယာခံစားမှု ဝေဒနာဖြစ်၏၊ ကျမ်းစာတို့၌ “သုခဝေဒနာ”ဟု ခေါ်သည်၊ မျိုးရိုးအလိုက် စိတ်ကြိုက်အားဖြင့် “မကောင်း”ဟု ထင်နေသော အာရုံနှင့် တွေ့သောအခါ မသာယာသော ခံစားမှု ဝေဒနာဖြစ်၏၊ “ဒုက္ခဝေဒနာ”ဟု ခေါ်သည်၊ အကောင်းဘက်လည်း မပါ, မကောင်းဘက်လည်း မပါသော အာရုံနှင့် တွေ့သောအခါ သာယာမှု မသာယာမှုမရှိသော ဝေဒနာဖြစ်၏၊“ဥပေက္ခာဝေဒနာ”ဟုခေါ်သည်၊ [ဥပေက္ခာ=ဥပ+ဣက္ခာ၊ ဥပ-သင့်ရုံ တော်ရုံ+ဣက္ခာ= ခံစားခြင်း၊ ““ခံစားတယ်””ဟု ဆိုရရုံ မသိမသာ ခံစားခြင်းတည်း၊ ထို မသိမသာ ခံစားခြင်းကို ““လစ်လျူရှုခြင်း””ဟုလည်း ပြောကြသည်၊]

အာရုံနှင့် ဓာတ်ခိုက်မှု ဖြစ်မှသာ ဤဝေဒနာလည်း ဖြစ်နိုင်၏၊ ဖဿ မဖြစ်သော အာရုံ၌ ဝေဒနာ မဖြစ်၊ မျက်စိကွယ်နေသူသည် အဆင်း အာရုံ၌ ဓာတ်ခိုက်မှု ဖဿ မရှိသောကြောင့် အဆင်းအာရုံကို ခံစားမှု ဝေဒနာလည်း မဖြစ်တော့ချေ။

ဝေဒနာကြောင့် တဏှာဖြစ်ပုံ

တပ်မက်, ခင်မင်, လိုချင်, တောင့်တမှုကို “တဏှာ” ဟု ခေါ်၏၊ သုခဝေဒနာ ဖြစ်ရ သောအခါ ထိုသုခ ဖြစ်ခိုက်၌ တပ်မက်မှု တဏှာ ဖြစ်၏၊ ထိုသုခမျိုး ထပ်၍ ထပ်၍ ရအောင် လိုချင် တောင့်တမှု တဏှာလည်း ဖြစ်၏၊ ဒုက္ခဝေဒနာ ဖြစ်ပြန်လျှင် ထိုဒုက္ခမှ လွတ်မြောက်၍ သုခရောက်အောင် တောင့်တမှု တဏှာ ဖြစ်ပြန်၏၊ ဥပေက္ခာဝေဒနာ (မသိမသာခံစားမှု) ဖြစ်ပြန်လျှင်လည်း မသိမသာ တောင့်တမှု တဏှာ ဖြစ်ပြန်၏၊

တဏှာဖြစ်သမျှ လောလောဆယ် ခံစား စံစားမှု ဝေဒနာသော်လည်း အရင်းခံရှိ၏၊ (သို့မဟုတ်) ရှေးက ခံစားခဲ့ရသော ဝေဒနာကို တွေး၍လည်း တောင့်တမှု တဏှာ ဖြစ်သေး၏၊ ယခုဘ၀၌ပင် မတွေ့ဖူး, မကြုံဖူး, မခံစားဖူး (မနောသမ္ဖဿ ဖြစ်ရုံမျှ) စိတ်မကူးဖူးသေးသော အာရုံ တို့၌ ဖဿ မဖြစ်သောကြောင့် ဝေဒနာ မဖြစ်၊ ဝေဒနာ မဖြစ်သော ကြောင့် ထိုမတွေ့ဖူး စိတ်မကူးဖူးသော အာရုံတို့၌ တဏှာ မဖြစ်၊ နတ်ပြည်ရှိသည်ဟု မကြားဖူးသော လူမျိုးတို့၌ နတ်သမီး နတ်သား အကြောင်း စိတ်မျှ မကူးဖူး၍ သောတသမ္ဖဿ, မနောသမ္ဖဿ မဖြစ်ကြချေ၊ ထို့ကြောင့် နတ်သမီး နတ်သား ဘ၀ကို မှန်းဆ၍ စိတ်ကူးအားဖြင့် ခံစားမှုဝေဒနာ မဖြစ်သောကြောင့် နတ်သမီး နတ်သားဘ၀ကို တောင့်တမှု တဏှာလည်း မဖြစ်ချေ။

တဏှာကြောင့် ဥပါဒါန်ဖြစ်ပုံ

ဖားကို မြွေဖမ်းရာ၌ စွဲစွဲလမ်းလမ်း မလွှတ်တမ်း ဖမ်းထားသကဲ့သို့ တဏှာဖြင့် တပ်မက် ခင်မင် လိုချင်တောင့်တမိသောအာရုံ၌ တမ်းတမ်းစွဲ ငမ်းငမ်းတက် ဖြစ်နေသော တဏှာအကြီးစားကို “ဥပါဒါန်”ဟု ဆိုထိုက်၏၊ ထိုတဏှာဖြင့် တပ်မက်မိသော အာရုံ၌ အထင်အမျိုးမျိုး ဖြစ်ကာ အယူမှားနေသော ဒိဋ္ဌိကိုလည်း “ဥပါဒါန်”ဟု ခေါ်၏။ [ဥပ-လွန်လွန်ကဲကဲ စွဲစွဲလမ်းလမ်း + အာဒါန-ယူခြင်း။]

          မြန်မာရာဇ၀င်၌ ရှင်ဘုရင်တစ်ဦးသည် တောလည်သွားရာ၌ နတ်သမီးနှင့် တွေ့ခဲ့၍ စွဲလမ်းအားကြီးသဖြင့် ရူးဖူးသတတ်၊ နတ်သမီးနှင့်တွေ့ရခြင်းသည် စက္ခုဖဿတည်း၊ ထိုဖဿကြောင့် သာယာမှု သုခဝေဒနာ ဖြစ်၏၊ ထိုသုခဝေဒနာကြောင့် တဏှာ ဖြစ်၏၊ ထိုတဏှာကြောင့် လွန်ကဲ ပြင်းပြစွာ စွဲလမ်းသော ဥပါဒါန် ဖြစ်ရသည်၊ နဂိုက နတ်သမီးကို တပ်မက်မှု တဏှာ မဖြစ်ခဲ့ပါလျှင် ဥပါဒါန်လည်း ဖြစ်မည် မဟုတ်၊ ထို့ကြောင့် ဥပါဒါန်ဟူသမျှ တဏှာကြောင့် ဖြစ်ရသည်ဟု မှတ်ပါ။

မှတ်ချက်။       ။ ဘ၀အဆက် မပြတ်အောင် သံသရာလည်ပုံ သတ္တ၀ါတစ်ယောက် ဆက်ကာ ဆက်ကာ ဖြစ်ပုံကို ပြသော တရားတော် ဖြစ်၍ “ဝေဒနာကြောင့်  တဏှာ ဖြစ်,  တဏှာကြောင့်  ဥပါဒါန် ဖြစ်ရသော”အဆက်ကို ပြထားတော်မူသည်၊  ဝေဒနာကြောင့်  သဒ္ဓါတရား စသည်တို့ဖြစ်၍ ၀ိပဿနာအားထုတ်လျက် သံသရာအဆက်ဖြတ်နည်းလည်း ရှိပါသေးသည်။

 

Credit to 

တင်ပြသူ Yanan Sanein အချိန် 5:52 AM