သရဏဂုံတင်
လူတစ်ယောက်၏ နောက်ဆုံး စုတေစိတ်နှင့် ဘ၀သစ် ပဋိသန္ဓေစိတ်သည် လက်ဖျောက်
တစ်ချက်တီးချိန်ကို ကုဋေတစ်သိန်းလောက် စိတ်လျှင် တစ်စိတ် လောက်သာ အချိန် ကြာ၏၊
“ဘ၀ဟောင်းက စုတေသည်နှင့် တစ်ပြိုင်နက်
ဘ၀သစ်မှာ ဖြစ်ရတော့၏”ဟု ဆိုလိုသည်၊ အိမ် အနီးအပါး၌ တစ္ဆေ ပြိတ္တာ ဖြစ်နေရသူများသည် ထိုတစ္ဆေဘ၀မှာပင်
အသစ် ဖြစ်ရ၏၊ နတ်ပြည်နှင့် ငရဲပြည်သို့ ရောက်မည့်သူလည်း ထိုခဏအတွင်းမှာပင် ထိုဘ၀သစ်၌
ဖြစ်ပြီးလေ၏။
ထို့ကြောင့် အလောင်းကောင်ကို သင်္ချိုင်းမှာ ဖြစ်စေ, အိမ်မှာ ဖြစ်စေ
သရဏဂုံတင်ကြောင်းကို သေလွန်သူ သိဖို့အရေးမှာ အလှမ်း ဝေးလှချေ၏၊ သိမည်ဆိုလျှင် အိမ်အနီး၌
(သုသာန်၌) တစ္ဆေ ပြိတ္တာ ဖြစ်နေသူလောက်သာ သိခွင့်ရှိသည်။
ယခုအခါ “သရဏဂုံတင် ဆိုသည်မှာလည်း အထူးအဆန်း မဟုတ်၊ ရိုးရိုးတန်းတန်း
သီလပေးခြင်း, လှူဖွယ်ပစ္စည်းကို ရေစက် ချ၍ သေသောသူအား အမျှပေးခြင်းပင်တည်း၊ ထိုတွင်
လှူဖွယ် ပစ္စည်းများကို လှူဒါန်း၍ အမျှပေးခြင်းကို ကောင်းသောနည်းလမ်း ဟုပင် ဆိုသင့်ပါ၏၊
ထိုအမျှပေးဝေမှုကို လူ့ပြည် နတ်ပြည် ငရဲနှင့် တောကြီးထဲမှာ ပြိတ္တာဖြစ်နေသူတို့ မသိကြ၊
ဝမ်းမမြောက်နိုင်ကြ၍ ကုသိုလ်အဖို့ကို မရကြသော်လည်း အနီးအပါး၌ ပြိတ္တာ တစ္ဆေ ဖြစ်နေသူမှာ
သိနိုင်, ၀မ်းမြောက်စွာ သာဓုခေါ်နိုင်လျှင် ကုသိုလ်အဖို့ ရဖွယ်ရှိပါပေ၏၊ သို့သော် ငိုကြွေးမြည်တမ်းလျက် သောက
ပရိဒေ၀ အကုသိုလ်ခြံရံကာ သုသာန်မှာ လှူဒါန်း အမျှဝေခြင်းကား အလှူ့ရှင် များမှာလည်း ကုသိုလ်
အရနည်း၏၊ တစ္ဆေ ပြိတ္တာ ဖြစ်နေသူလည်း ထိုငိုနေပုံကို မြင်ရသဖြင့် ၀မ်းမြောက်လှမည် မဟုတ်ပါ။
အသုဘပြုပြင်ရေး
“အားလုံးလူတွေ
တစ်နေ့လျှင် ဧကန်သေကြရမည်”ဟူသော ထုံးစံတရားကို မည်သူမဆို နားလည်ပြီး ဖြစ်၏၊ ထို့ကြောင့်
ဘယ်နည်းနှင့် သေသေ မထူးဆန်း လှချေ၊ သို့ရာတွင် သေလောက် ကျေလောက် ရောဂါရောက်နေသူ ကို
ဆွေမျိုးရင်းများက လူအား ငွေအားဖြင့် တတ်နိုင်သမျှ ကုသ သင့်၏၊ ထိုသို့ ကုသကြပါလျက်
သေသွားသူကို “ငါတို့ ၀တ္တရားတော့ အကျေသားပဲ, သူ့ကံက ဒီလိုဖြစ်ဖို့ စီမံလာတော့ ငါတို့တာဝန်
မဟုတ်, သူ့ကံပဲ”ဟု ဖြေသိမ့်ကာ ၀မ်းနည်းပူဆွေးမှုတွေကို သက်သာ နိုင်သမျှ သက်သာနိုင်ပါစေ။
[ကိုယ်ကျင့်အဘိဓမ္မာ၌ ပြထားသော သေခါနီးပြုပြင်ရေးနှင့် သောက ပရိဒေ၀အကြောင်းများကို
ကြည့်ရှု၍ လိုက်နာကြပါလေ၊] ထိုသို့ စိတ်သက်သာနိုင်သမျှ သက်သာအောင် ဖြေ၍ အချိန်ရှိသေး
လျှင် ထိုနေ့မှာပင် အချိန်မရှိလျှင် နောက်တစ်နေ့၌ (ထုံးစံ မဖျက် လိုလျှင်) မိမိတို့
ကိုးကွယ်နေကျ ဆရာသမားကို အိမ်သို့
ပင့်၍ သရဏဂုံတင်ပါ၊ ထိုသို့ သရဏဂုံတင်ရာ၌ လှူဖွယ်ပစ္စည်းများလည်း မလိုသေးပါ၊
ဆရာသမားကလည်း သူတို့၏ သောက ပရိဒေ၀ လျော့စေနိုင်သော တရားစကားများကို တတ်နိုင်သမျှ ဟောပြသင့်ပါသည်။
ဆွမ်းသွတ်အမျှဝေ
ထို့နောက်
(၇-ရက်လည်အောင် မဆိုင်းဘဲ) မိမိတို့ အခွင့်သာသော တစ်ရက် နှစ်ရက် အတွင်းမှာ တတ်နိုင်သမျှ
ဆွမ်း, အ၀တ်, ဖိနပ် စသော လှူဖွယ် ၀တ္ထုများကို ပြင်ဆင်၍ (ထိုအချိန် အလှူမျိုး၌ ငွေကို
မလှူရ၊) သွားလေသူကို သင်္ချိုင်းတိုင်အောင် သွားရောက် ဖိတ်ခေါ်ပြီးလျှင် သီလသိက္ခာ အရှိဆုံးဟု
ယုံကြည်ရလောက်သော ဘုန်းတော်ကြီး တစ်ပါးဖြစ်စေ, သံဃာကိုပင့်၍ သံဃိကဒါနဖြစ်စေ လှူဒါန်းကာ
သွားလေသူ၏ နာမည်ကို ခေါ်ယူ အမျှဝေပါ။
သွားလေသူသည် အိမ်အနီးအပါး၌ ပြိတ္တာဖြစ်နေလျှင် မိမိ အတွက် ပြုသော
ထိုအလှူကို ၀မ်းမြောက်စွာ သာဓုခေါ်၍ ကုသိုလ် အဖို့ရလျက် အစားအ၀တ်များ ချက်ချင်း အကျိုးရပါလိမ့်မည်၊
[ရတနာ့ဂုဏ်ရည်၌လည်း ဤအမျှဝေနည်းကို ရေးထားပါသည်၊] ဤပြခဲ့သော နည်းသည် အကုန်အကျလည်း သက်သာ,
လိုရာ အကျိုးလည်း အမှန်ပြီးစေနိုင်သောနည်း ဖြစ်ရကား အနာဂတ် ကာလ၌ အသင်းအပင်းဖွဲ့ကာ ဤနည်းကို
အမြန်ဆုံးလိုက်နာသင့်ပါသည်။
No comments:
Post a Comment