သစ္စာလေးပါး အကြောင်းအကျိုးဆက်ပုံ
ယခု
အချိန်အခါသည် မြန်မာနိုင်ငံကို လက်အောက်ခံ
ဘ၀မှလွတ်အောင် ကြိုးစား၍ လွတ်လုခါနီး ဖြစ်နေသော အချိန်အခါတည်း၊ ဘာ့ကြောင့် ကျွန်ဘ၀သို့
ရောက်ခဲ့ရပါသလဲ၊ (၁၂၄၇ တစ်ထောင့်နှစ်ရာလေးဆယ်ခုနစ်)ခုနှစ် မရောက်မီက မြန်မာပြည်သူ ရှင်လူဟူသမျှတို့သည်
တိုင်းရေးပြည်ရာဝယ် အမြင်မကျယ်ခဲ့ကြ၊ (အသိဉာဏ် နည်းခဲ့ကြ၏၊) မြန်မာပြည် အောက်ပိုင်းကို
ပေးလိုက်ရသည့်တိုင်အောင်လည်း သတိမရခဲ့ကြ၊
တိုင်းရေးပြည်ရာဝယ်လည်း
အမြင်မကျယ်ခြင်းသည် အကြောင်း, ကျွန်ဘ၀၌ ဒုက္ခဖြစ်ရခြင်းသည် အကျိုး၊ ယခုအခါ လွတ်လပ်အောင်
ကြိုးစားကြခြင်းသည် အကြောင်း, နောင် လွတ်လပ်ခွင့်ရခြင်းသည် အကျိုး၊ ဤသို့လျှင် လက်ရှိ
နိုင်ငံရေး၌ မကောင်းသော အကြောင်း နှင့် အကျိုးသည်လည်းကောင်း, လွတ်လပ်ရေးနှင့်ဆိုင်သော
ကောင်းသော အကြောင်းနှင့် အကျိုးသည်လည်းကောင်း ဆက်သွယ် နေသကဲ့သို့ ထို့အတူပင် တဏှာလောဘ
သမုဒယသစ္စာသည် အကြောင်း, ဇာတိမီး အစရှိသည်တို့၏ လောင်စာဖြစ်သော ရုပ် နာမ် ခန္ဓာသည် အကျိုးတည်း၊
(ဤကား မကောင်းကြောင်းနှင့် မကောင်းကျိုးတည်း၊) သမုဒယသစ္စာ တဏှာ လောဘကြောင့် ကျွန် ဘ၀ရောက်နေသော
ဒုက္ခသစ္စာ ခန္ဓာအနေမှ ထွက်မြောက်အောင် ကြိုးစားသော ၀ိပဿနာအခြေခံပါသော မဂ္ဂသစ္စာသည် အကြောင်း,
ဒုက္ခအားလုံးမှ ကုန်ဆုံးလွတ်လပ်ရာ နိရောဓသစ္စာသည် အကျိုး၊ (ဤကား ကောင်းသော အကြောင်းနှင့်
အကျိုးတည်း။)
မဂ္ဂင်လမ်းကို လိုက်ကြည့်စမ်းပါ
ဤသို့လျှင် မကောင်းကြောင်းနှင့် မကောင်းကျိုးနှစ်ပါးကို လောကီသစ္စာ, ကောင်းကြောင်းနှင့်ကောင်းကျိုး
နှစ်ပါးကို လောကုတ္တရာသစ္စာ (လောကမှ လွတ်မြောက်သော သစ္စာ)ဟု ခွဲ၍ လောကီအကြောင်းဖြစ်သော
တဏှာသမုဒယများလေ ဒုက္ခ များလေ, တဏှာသမုဒယနည်းလေ ဒုက္ခနည်းလေ, တဏှာသမုဒယ လုံးလုံးမရှိလျှင်
(ကိုယ့်ကိုယ်ကိုသော်မှ မခင်တွယ်လျှင် နောင်ရဖို့ ရန်လည်း အမှန် မလိုလားတော့လျှင်) ဒုက္ခသည်လည်း
လုံးလုံး မရှိတော့ပြီ၊ “မဇ္ဈိမပဋိပဒါ”ခေါ် မဂ္ဂင်ရှစ်ဖြာ ၀ိပဿနာ ရင့်သန်လေ, နိရောဓနှင့်
နီးလေ၊ ၀ိပဿနာ အစွမ်းကုန်ရင့်၍ မဂ္ဂသစ္စာ ဖြစ်လေ, နိရောဓသစ္စာကို သိနိုင်လေပင်တည်း။
ထို့ကြောင့် ယခုကာလ နိဗ္ဗာန်၏သဘောကို ကြံဆနေသူ တို့သည် မဂ္ဂင်ရှစ်ပါး
လမ်းကြောင်းကို မတိမ်းမစောင်း လိုက်၍ ကြည့်သင့်ကြ၏၊ ရန်ကုန် မရောက်ဖူးသေးသူသည်… “ရန်ကုန်
ရောက်ချင်စမ်းပါဘိ, ရွှေတိဂုံ ဖူးချင်စမ်းပါဘိ”ဟု မြည်တမ်းနေရုံ မျှဖြင့် ကိစ္စမပြီး၊
ရန်ကုန်သွားဖို့ရာ ရိက္ခာစုဆောင်း၍ မြန်မြန် သွားနိုင်မှ ရွှေတိဂုံ ဖူးရမည်။
ထို့အတူ ယခုအခါ ““နိဗ္ဗာန်ကို မြန်မြန် ရလိုပါ၏””ဟု ဆုတောင်း နေရုံဖြင့်
တင်းတိမ်ရမည့်အချိန် မဟုတ်၊ မိမိအစွမ်းဖြင့် သတ္တ၀ါတို့ အကျိုးများအောင် ဆောင်နေသူမှတစ်ပါး
သူတော်ကောင်းမှန်သမျှ နိဗ္ဗာန်သွားဖို့ရာ လမ်းကြောင်းဖြစ်သော မဇ္ဈိမပဋိပဒါ မဂ္ဂသစ္စာ လမ်းကို
လိုက်ကြမှ အပြောနှင့်အလုပ် ညီမျှ၍ နိဗ္ဗာန်ကို မြင်နိုင်ကြ ပေမည်။
သတိပြုဖွယ်
ထိုလမ်းသို့
လိုက်နေသူ (ယောဂီ)ပုဂ္ဂိုလ် မှန်လျှင် လောကီ ဂုဏ်ပကာသနကို (ကိုယ့်ကိုယ်တိုင်က မသိနိုင်သော
တဏှာဖြင့်) မသိမသာ လိုလားနေတတ်ကြ၏၊ ထို တဏှာကို ပီပီသသ ဖြတ်နိုင်ရမည်၊ ထို့ပြင် ခန္ဓာကိုယ်
ရုပ်နာမ်၌ အနိစ္စ ဒုက္ခ ထင်မြင်ပါသော်လည်း အတ္တစွဲလမ်းချက် မကင်းဘဲ ရှိတတ်သေး၏၊ ထိုသို့
အတ္တစွဲလမ်းနေသည်ကို ကိုယ့်ကိုယ်တိုင်ပင် သိနိုင်ခဲ၏၊ အတ္တစွဲ ကျန်နေသေးလျှင် တရားပေါက်နေပြီဟု
ထင်နေသော်လည်း မပေါက်သေးပါ။
သောတာပန်ဖြစ်လာလျှင် ““သက္ကာယဒိဋ္ဌိ”” ခေါ် အတ္တစွဲ မရှိ တော့ပါ၊ ထို့ကြောင့် ယခုပြမည့် အနတ္တလက္ခဏသုတ်တော်သည် အတ္တ
စွဲလမ်းမှုတွေ လုံးဝကုန်စင်အောင် အစုံအလင် ပြမည့် တရား တော်ဖြစ်ရကား ဤ ပြအပ်လတံ္တ့အတိုင်း
လေးလေးပင်ပင် ဆင်ခြင် ရှုစားကြပါကုန်။
ဓမ္မစကြာမှတ်ဖွယ်ပြီး၏။
No comments:
Post a Comment