အနာဂတ်သာသနာရေး အပိုင်း(၅၁) သမ္မာဝါစာ---သမ္မာအာဇီဝ

သမ္မာဝါစာ

မုသာဝါဒ =  မုသားပြောမှု  (လိမ်မှု,  လှည့်ပတ်မှု, ညာဖြန်းမှု) ပိသုဏ၀ါစာ=ရန်တိုက်မှု၊ ဖရုသ၀ါစာ= ကြမ်းတမ်းယုတ်မာ ဆဲဆိုမှု၊ သမ္ဖပ္ပလာပ= အဖျင်းစကား အပျက်စကား (သက်သက် ရယ်မောစရာသာ ဖြစ်၍ အကျိုးမရှိသော စကား) ပြောမှုများကို “၀စီဒုစရိုက် = နှုတ်ဖြင့် မကောင်းပြုကျင့်မှု” ဟု ခေါ်၏၊ ““မိစ္ဆာဝါစာ””ဟုလည်း ခေါ်၏၊ ထိုစကားလေးမျိုးကို ပြောခွင့်ကြုံလာလျက်  မပြောမိအောင် ရှောင်ခြင်းသည် သမ္မာဝါစာမည်၏။

          မှန်သောစကားကိုသာ ပြောခြင်း၊ တစ်ယောက်နှင့်တစ်ယောက် မကွဲပြားအောင် ညီညီညွတ်ညွတ် သင့်သင့်မျှမျှ ရှိအောင် ပြောပေးခြင်း၊ နားထောင်သူတို့မှာ အကျိုးများသော စကားကို သာယာ ချေငံစွာ ပြေပြေပြစ်ပြစ် ပြောခြင်း၊ ကြားနာသူတို့၏ ကောင်းကျိုး သက်သက်ကို မျှော်၍ (ဂုဏ်ရဖို့ လာဘ်ရဖို့ကို မမျှော်ဘဲ) တရား ဟောပြခြင်းများလည်း သမ္မာဝါစာပင်တည်း။

သမ္မာကမ္မန္တ

ပါဏာတိပါတမှု, အဒိန္နာဒါနမှု, ကာမေသုမိစ္ဆာစာရမှု ဤသုံးပါးကို ““ကာယဒုစရိုက် = ကိုယ်ဖြင့် မကောင်းကျင့်မှု””ဟု ခေါ်၏၊ ““မိစ္ဆာကမ္မန္တ””ဟုလည်း ခေါ်၏၊ ထို သုံးမျိုးမှ ရှောင်ခြင်း (ပြုခွင့်ကြုံလာလျက် မပြုဘဲ ရှောင်ခြင်း)သည် သမ္မာကမ္မန္တ မည်၏၊

သူတစ်ပါး၏ အသက်ရှည်ကြောင်း, အနာ ရောဂါ ကင်းကြောင်း, ဆေးဝါးစုဆောင်းမှု ဆေးတိုက် ဆေးရုံဖွင့်၍ ကုသိုလ်ပြုမှု, သူတစ်ပါးဥစ္စာ လုံခြုံအောင် စောင့်ရှောက်ပေးမှု, ဒါနပြုမှု, သူတစ်ပါးတို့ စိတ်ကြည်နူးအောင် တံမြက်လှည်းမှု, လမ်းပြင်ပေးမှု, ဘုရားတန်ဆောင်း စသည်၌ သန့်ရှင်းစင်ကြယ်အောင် ပြုမှု, ကမ္မဋ္ဌာန်းအားထုတ်ဖို့ရာ နေရာထိုင်ခင်း သန့်ရှင်းပေးမှုစသော ကိုယ်မှုဟူသမျှသည် သမ္မာကမ္မန္တချည်းတည်း။

သမ္မာအာဇီဝ

[အာဇီဝ-အသက်မွေးဖို့ ပစ္စည်းရှာဖွေမှု၊]  ပါဏာတိပါတ စသော ဒုစရိုက် မပါစေဘဲ တရားသဖြင့် လယ်ယာလုပ်၍ ကုန်ရောင်း၍ ငွေချေး၍ အသက်မွေးခြင်း, ကိုယ်ဖြင့် ရင်းနှီး၍ ပညာဖြင့် ရင်းနှီး၍ အသက်မွေးခြင်း, အချုပ် အားဖြင့် ငါးပါးသီလ မပျက်အောင် အသက်မွေးခြင်းသည် ““သမ္မာ အာဇီဝ”” ဖြစ်၏၊ ထိုသို့ မဟုတ်ဘဲ ဒုစရိုက်မှုဖြင့် အသက်မွေးခြင်း, လိမ်လည် လှည့်စား၍ ရောင်းဝယ် အသက်မွေးခြင်းသည် ““မိစ္ဆာဇီဝ”” ဖြစ်၏။

ရဟန်းမိစ္ဆာဇီဝ

ရဟန်းဖြစ်လျှင် လူတို့၌ ဖြစ်တတ်သော မိစ္ဆာဇီဝများအပြင် (၀ိနည်းတော်နှင့်မညီသော) ဒကာ ဒကာမတို့ကို လောကွတ်ပျူငှာ ပြုခြင်း, သူတို့ လာသောအခါ ဖျာ သင်ဖြူး ခင်းပေးခြင်း, ထမင်း လက်ဖက်ရည်ပေးခြင်း, သင့်တော်ရုံထက် ပိုမိုလျက် မျက်နှာလို မျက်နှာရ အရေးပေးခြင်း, ကလေး ပါလာလျှင် ထိုကလေးကို ချော့မြှူခြင်း, မုန့်ပေးခြင်း စသည်တို့ကို မိမိအား လှူချင်လာအောင် ကျေးဇူးတင်အောင် ပြုသည့်တွက် လူတို့က ပြန်၍ လှူအပ်သော ပစ္စည်း၊ မိမိအား ကြည်ညိုလာအောင် လူတို့အိမ်၌ ထွက်ဝင် နှုတ်ဆက်၍ ကြည်ညိုသောကြောင့် ရအပ် သော ပစ္စည်း၊ သစ်သီး ပန်း ဆေးပေးသဖြင့် ပြန်၍ လှူသော ပစ္စည်း များလည်း မိစ္ဆာဇီဝ ဖြစ်၏။

          အချုပ်မှာ…ကိုယ်တိုင်ဖြစ်စေ, အလံရှူးထား၍ဖြစ်စေ, ဆွယ်မှ ရအပ်သော ဆွမ်း သင်္ကန်း ကျောင်း ဆေး စသော ပစ္စည်းဟူသမျှ ရဟန်းများအတွက် မိစ္ဆာဇီဝချည်းတည်း၊ လူများ၌ မိစ္ဆာဇီဝပစ္စည်းကို ရအောင် ရှာဖွေတုန်းက အပြစ်ရှိသော်လည်း သုံးစွဲခိုက်မှာ တရားသဖြင့် သုံးစွဲပါမူ အပြစ်မရှိပေ၊ ရဟန်းများ၌ကား သုံးစွဲနေတုန်းမှာလည်း အပြစ်ရှိ၏၊ ထိုပစ္စည်းကို ဥစ္စာရှင် ရဟန်းသာမက အခြား ရဟန်းများလည်း မသုံးစွဲကောင်းတော့ချေ၊ သုံးစွဲတိုင်း သုံးစွဲတိုင်း ဒုက္ကဋ်အာပတ် သင့်ကြလေသည်။

တင်ပြသူ Yanan Sanein အချိန် 5:16 AM