အနာဂတ်သာသနာရေး အပိုင်း(၈၇)ခမည်းတော်ကြီး မကျန်းမာချိန်

ခမည်းတော်ကြီး မကျန်းမာချိန်

ဤသို့အားဖြင့် ၀မ်းနည်းညှိုးငယ်ဖွယ်ရာ ကိုယ်ခန္ဓာ  ဆင်းရဲကလေးများကို “ဘယ်သူ မပြု မိမိမှု” ဟု တွေးတော ဆင်ခြင်ကာ စိတ် သက်သာစွာဖြင့် ပညာသင်ကြားနေရာ ရဟန်းသုံးဝါ အရတွင် ပခုက္ကူ တိုက်ကြီး၌ စာချအဖြစ် ချီးမြှောက်ခံရ၍ ဆွမ်းဒုက္ခမှ ကျွတ်လွတ် ပြီးနောက် ခြောက်ဝါမြောက်မှ စ၍ သကျသီဟ စာသင်စာချနှင့် အစိုးရ ပထမကျော်ကို ရှစ်ဝါအတွင်း ပြီးမြောက်စေပြီးလျှင် စာပေ ပို့ချရင်း ကျမ်းစာများကို ရေးသား၍ နေစဉ် ခမည်းတော်ကြီး မကျန်းမမာ ဖြစ်လာလေသည်၊ ဆေးကုဖို့ရာ ငွေလည်း မည်မည်ရရ မရှိပါ၊ ဘယ်တော့ကမှလည်း ငွေကို မစုဆောင်းခဲ့၊ အကျော်အောင် စဉ်က ရခဲ့သော ခြောက်ရာကျော်လောက်ကိုလည်း ရန်ကုန်သို့ သွားဖွယ်ကိစ္စရှိသဖြင့် စရိတ်ကို ချန်၍ ဒကာကြီးအား အားလုံးကို စွန့်လိုက်၏၊

          ထိုအချိန်၌ ကျမ်းစာအုပ်များလည်း တစ်အုပ်မျှသာ ရိုက်ပြီးသေး၏၊ ရဟန်းအမကြီးများ၏ ကျန်ရစ်ခဲ့သော သမီးကလေးက တစ်လ တစ်ဆယ်တန်(နွားနို့, ညနေဖျော်ရည်သောက်ရန်) ကပ္ပိယထံ အပ်နှံထားလေ့ရှိ၏၊ ထိုကဲ့သို့ မရှိမဲ့ ရှိမဲ့ ဖြစ်နေသော်လည်း အများကမူ (ရပ်ရွာရှိ ဆွေမျိုးများကပါ) ငွေတွေ အလွန် ပေါများနေသည်ဟု ထင်နေကြလေ၏၊ ထို့ကြောင့် ဒကာကြီးအတွက် ရပ်ရွာသို့ ရောက်သောအခါ အဘိုးလေးတော်သူက “ကိုယ်တော့် ဒကာကြီးတော့ ရမယ်မထင်ဘူး၊ ငွေ ဘယ်လောက်ပါတုံး”ဟု မေးရှာလေသည်။

ကြွေးစာရင်းရှင်းရပုံ              

ခမည်းတော်ကြီးကား  ထိုရောဂါဖြင့်ပင် ကွယ်လွန်ရှာလေပြီ၊ ထိုကိစ္စအတွက် မည်သူ့အထံမှလည်း အလှူမခံလိုပါ၊ ထို့ကြောင့် နံနက်စောစောတွင် ကွယ်လွန်၍ ညနေ ကိစ္စပြီးဖို့ရန် ပြောရာ အားလုံးက တားကြ၏၊ ရပ်ရွာထုံးစံအတိုင်း ငါးရက်ထားပြီးမှ ကိစ္စပြီးရ၏၊ ကိစ္စပြီးသော ညမှာ ၀ါဆိုဖို့ရန်ကလည်း နီးနေသဖြင့် မန္တလေး မပြန်ခင် (မယ်တော် ကြီးကို ကြွေးတွေနဲ့ ပစ်မထားခဲ့ချင်သောကြောင့်) အနားမှာရှိသော ၀မ်းကွဲ အစ်ကိုကြီးနှင့် ဦးကြီးကို ကြွေးစာရင်း ရှင်းပေးဖို့ရန် ပြောရတော့၏၊

“ရှင်း”ဆိုသော်လည်း ငွေထုတ်ပြီး ရှင်းပေးနိုင်သော အရှင်းမျိုး မဟုတ်၊ ပေါင်နှံထားသော လယ်ယာများကို အပြီးအပိုင် အပ်သောအားဖြင့် ရှင်းရသော အရှင်းမျိုးတည်း၊ ကြွေးရှင်များလည်း ဆွေမျိုးများဖြစ်ကြသောကြောင့် ဘုန်းကြီးကို ငဲ့ညှာ၍ လွယ်ကူစွာ ရှင်းပေးရုံမက “နောင်အခါ ပြန်ရွေးယူနိုင်ပါသည်”ဟုပင် ၀န်ခံကြပါသည်။

တရားဖြင့် ကာကွယ်ပုံ

ဘုန်းကြီး၏  ထိုအချိန်တိုင်အောင် လွန်ခဲ့သော တစ်သက်တာသည် သက်သာလှသည် မဟုတ်၊ ပထမကျော်, ဓမ္မာစရိယ, ကျမ်းပြု, စာချ, ဓမ္မကထိကဟု အမွှမ်းတင်ကြသော်လည်း ခမည်းတော် အသည်းအသန် ဖြစ်သည်ကိုမျှ အားရပါးရ ကုနိုင်သော အရည်အချင်း မရှိရုံ သာမက ခမည်းတော် ကွယ်လွန်စ၌ ကြွေးရှင်းရသူ ဖြစ်သည့်တိုင်အောင် ဒါနအကျိုးပေး ချို့ငဲ့လှ၏ဟု ကိုယ့်ကိုယ်ကို တွေးကာ “နိဗ္ဗာန်ကို မျက်မှောက် မပြုနိုင်သေး၍ သံသရာ၌ ကျင်လည်ရဦးမည် ဖြစ်လျှင် ဒါနအတွက် မျက်နှာငယ်ရသော ဘ၀သို့ မရောက်စေရ၊ ရှေးရှေးဘ၀တွေက အသိဉာဏ် နည်းလှ၍ ကံအမျိုးမျိုးကို ပြုခဲ့ကြသော ငါတို့ မိသားတစ်စုသည် ယခုဘ၀ ထိုဒဏ်ကို ခံရပေမည်၊ ငါ၏ အတွက်ကား သည့်ထက် ကြီးလေးသော ဒုက္ခကို ခံရသော်လည်း ငါသိထားသော တရားသည် ငါ့အဖော်ကောင်းပမာ အားပေးစေရမည်၊ ဘုရားအလောင်း အရင့်အမာကြီးတွေပင် တစ်ရံ တစ်ခါ ဒွန်းစဏ္ဍားဘ၀၌ ဖြစ်ရသေး၏၊ ငါသည် ဘာပြုလို့ ဒီဒုက္ခမျိုးကို မခံဝံ့ဘဲ ရှိရမည်နည်း”စသည်ဖြင့် တွေးကာ တရားဖြင့်သာ ဒုက္ခကို ကာကွယ်ခဲ့ရပါသည်။

ရည်ရွယ်ချက်များ      

ဘုန်းကြီး၏  ဒုက္ခတို့ကား  ဤပြခဲ့သမျှ  မကသေးပါ၊ မယ်တော်ကြီးနှင့် စပ်၍ နောက် ဆက်တွဲ ဒုက္ခတွေ များချေသေး၏၊ ဤသို့ ကိုယ်တွေ့ဒုက္ခတချို့ကို ထုတ်ပြရာ၌ ရည်ရွယ်ချက် အကျိုးကို ပြပါဦးမည်၊… ဘုန်းကြီးကား ငယ်ရွယ်စဉ်က ခပ်အေးအေး နေထိုင်လေ့ရှိ၏၊ အရွယ်ရောက်၍ ဒုက္ခတွေ ပေါ်ပေါက်သည့်အခါ မျက်နှာတင်းတင်း နေလေ့ရှိ၏၊ စာပေ ပညာဘက်ကမူ ငယ်စဉ်ကပင် နာမည်ရခဲ့၏၊ အစိုးရ အငယ်အလတ်တန်းကို ကျောင်းသားဘ၀၌ အောင်၍ ပထမကြီးတန်းကို ကိုရင်ဘ၀က အောင်ခဲ့၏၊ တရားကိုကား ကိုရင်ဖြစ်လျှင် ဖြစ်ချင်း ဟောခဲ့၏၊ ထိုစာပေဂုဏ်တွေနှင့် မျက်နှာထား တင်းမာမှုကို အကြောင်းပြု၍ အများကပင် “အလွန် ဘုန်းကံကြီးသူ, မာနလည်း အလွန်ကြီးသူ”ဟု ထင်ကြ၏။

          အမှန်မှာ ပညာနှင့်လိုက်အောင် ဘုန်းကြီးသူလည်း မဟုတ်ပါ၊ မာနကြီးသူလည်း မဟုတ်ပါ၊ “ထိုကဲ့သို့ မျက်နှာထား မတင်းလျှင် သာ၍ အောက်ကျ နောက်ကျ ဖြစ်မည်စိုးသောကြောင့် မတင်းချင်ဘဲနှင့် တင်းခဲ့ရပါသည်”ဟု အများကို သိစေလိုပါသည်၊ ထို့ပြင် တချို့ လူများသည် အများတွေ့နေကျ ပစ္စည်းဆုတ်ယုတ်မှု, ဆွေကွဲ မျိုးကွဲ သေကွဲ ကွဲရမှု ကြုံလာလျှင် ထိုဒုက္ခများကို မခံနိုင်အောင် ရှိကြ၏၊ ထိုသို့ ဖြစ်သည့်အခါ တရားဖြင့် ကာကွယ်စေလိုသော ကြောင့်လည်း ဘုန်းကြီး၏ ကိုယ်တွေ့ ဒုက္ခတချို့ကို ထည့်သွင်း ပြလိုက်ပါသည်။

 

Credit  to 

တင်ပြသူ Yanan Sanein အချိန် 5:54 AM