အနာဂတဘယသုတ်တော်
၁။ အနာဂတ်ဘေးငါးမျိုး
ဘိက္ခုတို့…
ဤပြလတ္တံ့သော ဘေးတို့သည် ယခု (ထို သုတ်တော်ကို ဟောတော်မူချိန်မှာ) မဖြစ်သေးဘဲ နောင်အခါ
ဖြစ်ကြလိမ့်မည်၊ ထိုဘေးများကို သင်တို့ သိထားနှင့်ကြ၊ သိပြီး၍ ထိုဘေးများ မပေါ် လာအောင်
ကြိုးစားကြ၊ ထိုဘေးတို့ကား…
၁။ (မိမိကိုယ်ကို ဣနြေ္ဒရရနှင့်
နေတတ်အောင် ပြုပြင်သောအားဖြင့်) ခန္ဓာကိုယ်၏ တိုးတက်ကြီးပွားမှုလည်း မရှိကြသော, သီလသိက္ခာ
တိုးတက်မှုလည်း မရှိကြသော, စိတ်နေစိတ်ထား သမာဓိတိုးပွားမှု လည်း မရှိကြသော, လောကုတ္တရာပညာ
တိုးပွားမှုလည်း မရှိကြ သော ရဟန်းတို့သည် သူတို့ကိုယ်တိုင် ဥပဇ္ဈာယ်ဆရာကြီးလုပ်ကာ အခြားသူတို့ကို
ရဟန်းပြုပေးကြလိမ့်မည်၊ ထိုသို့ အရည်အချင်း မရှိသော ဥပဇ္ဈာယ်ဆရာတို့သည် မိမိတပည့်များ
ကိုယ်နေ စိတ်ထား သီလ သမာဓိ ပညာတိုးပွားအောင် ဆုံးမနိုင်ကြတော့မည် မဟုတ်၊ ထိုတပည့်များလည်း
ကိုယ်နေ စိတ်ထား သီလ သမာဓိ ပညာတရား တိုးပွားခြင်း မရှိဘဲ မိမိတို့၏ လက်အောက်တပည့်များကို
ရဟန်းပြု ပေးကြလိမ့်ဦးမည်၊ ဤသို့ အဆက်ဆက် တရားပျက်ခြင်းကြောင့် ၀ိနည်းပျက်ပြားခြင်းဟူသောဘေး
ပေါ်လာလိမ့်မည်။
၂။ ဤ (၂)နံပါတ်၌ နိဿရည်းဆရာ လုပ်၍ တပည့်များကို
နိဿရည်းပေးခြင်းသာ ထူးသည်၊ [အရပ်တစ်ပါးမှ လာနေသော တပည့်များ၏ အမှီခံဆရာကို နိဿရည်းဆရာဟု
ခေါ်၏။]
၃။ ခန္ဓာကိုယ်နှင့် သီလ သမာဓိ ပညာ တိုးပွားမှု မရှိကြသောနောက်ခေတ် ရဟန်းတို့သည် အဘိဓမ္မာတရား,
ဉာဏ်ရမှုနှင့် ယှဉ်သော တရားများကို ဟောကြသောအခါ မကောင်းသော စိတ်ထားဖြင့် သူတစ်ပါးတို့ကို
ပုတ်ခတ် စော်ကားခြင်း, ပစ္စည်း ရအောင် ဟောခြင်းတို့ဖြင့် စိတ်ဆိုး စိတ်ညစ်တွေ ပေါ်ပေါက်၍
တရားစစ် သဘောမှန်ကို သိကြတော့မည် မဟုတ်၊ (ဥပမာ … သင်္ဂြိုဟ်စကားပြောရင်း ငြင်းကြ ခုံကြ
ကိုယ်တတ်ကြောင်းပြကြ လာဘ်ရမှုများကို လိုလားကြသဖြင့် သဘောအမှန်ကို ဝေဖန် နားလည်မှု မရှိကြတော့ဘဲ
သူတို့ကိုယ်တိုင်ပင် ပစ္စည်းလိုချင်သော လောဘ, သူတစ်ပါးကို စော်ကားသော ဒေါသတွေ ဖြစ်နေတော့
သကဲ့သို့တည်း။)
၎။ ကိုယ်အနေအထားနှင့် သီလ သမာဓိ ပညာ တိုးပွားမှု
မရှိသောနောက်ခေတ် ရဟန်းတို့သည် ဗုဒ္ဓကိုယ်တိုင် ဟောကြားတော် မူခဲ့၍ လေးနက်လှစွာ ခန္ဓာ,
အာယတန, ဓာတ်, သစ္စာ, ပဋိစ္စ သမုပ္ပာဒ် တရားတော်များကို ဟောလျှင် မနာချင်ကြ, ထို တရား များကို
သင်ယူထိုက်သည်ဟုပင် မမှတ်ထင်ကြ၊ သာသနာ့ပြင်ပ ဖြစ်သူတို့က ရွတ်၍ကောင်းအောင် အဆန်းတကြယ်
ဖွဲ့စီအပ်သော ဂါထာများကိုသာ နားထောင်လိုကြ, သင်ယူလိုကြလိမ့်မည်၊ (ယခု အခါဝယ် ဘုရားဟောဖော်
ပါဠိတော် အစစ်အမှန်ကို မသင်ယူလိုဘဲ, သင်ရသော်လည်း စိတ်တက်ကြခြင်း မရှိဘဲ အခြားဘာသာစကား
များကို သင်ရမှ စိတ်အားထက်သန်ကြပုံမျိုးတည်း။)
၅။ ကိုယ်နေကိုယ်ထား သီလ သမာဓိ ပညာ တိုးပွားခြင်း
မရှိကြသော နောက်ခေတ် ရဟန်းတို့သည် အလျော့ အတင်း နှစ်မျိုး ရှိရာဝယ် အလျော့ဘက်၌သာ ရှေ့သွားခေါင်းဆောင်
လုပ်ကြလိမ့်မည်၊ တောကျောင်း စသည်၌ ငြိမ်သက်စွာ တရားနှင့် နေမှု ကိစ္စ၌ လုံ့လ ၀ီရိယ လျှော့ချထားကြလိမ့်မည်၊
“အပေါင်းအဖော်မှ ခွဲခွာ၍ တစ်ကိုယ်တည်း နေဖို့ရန်နှင့် မကောင်းသော စိတ်တွေမှ ခွဲခွာ၍
တရားစိတ်ဖြင့် နေဖို့ရန် စိတ်ကူးမျှ ထည့်ကြတော့မည် မဟုတ်”ဟူလို။
စဉ်းစားဖွယ်
ထိုဘေးငါးမျိုးလုံးပင်
ယခုအခါဝယ် သာသနာတော်၌ ဆိုက်ရောက်လျက် ရှိ, မရှိကို စဉ်းစားသင့်၏၊ ၁, ၂ နံပါတ်အရ (အချို့ဆရာတော်များကို
ထား၍) များစွာသော ဆရာဥပဇ္ဈာယ်တို့သည် တပည့်များကို နိုင်နင်းအောင် ဆုံးမ နိုင်ကြပါသေး၏လော၊
မိမိတို့ ကိုယ်တိုင်ကလည်း တပည့်များ ခံ့ညား ရိုသေအောင် သီလ သမာဓိ ပညာ တိုးပွားကြပါ၏လော၊
ထို ဆရာသမားတို့၏ တပည့်တို့က အသက်ကြီး၍ ဆရာ ဥပဇ္ဈာယ် လုပ်ကြပြန်လျှင် ယခင် ဆရာ၏ အဆင့်အတန်းကိုမျှ
မီကြပါဦး မည်လော။
၃, ၄, ၅ နံပါတ် အနာဂတ်ဘေးများလည်း ယခုအချိန်မှာ ဘယ်အခြေအနေ ရောက်နေပြီလဲ၊
စာသင်စာချကြရာ၌ (စာမေးပွဲ များ၏ စည်းကမ်းကြောင့်) ဗုဒ္ဓတရားတော်ထက် ဗုဒ္ဓတရားတော် မဟုတ်သော
သဒ္ဒါ, သင်္ဂြိုဟ် စသည်ကိုလည်းကောင်း, ဗုဒ္ဓတရားတော်ကို အနည်းငယ်ပြ၍
အပိုကျမ်းစာများကိုလည်းကောင်း သင်ယူရသော အချိန်က များနေပြီ မဟုတ်ပါလော၊ ထို့ကြောင့်လည်း
အချိန် ကြာသလောက် ဗုဒ္ဓဟောတော်မူရင်းကို အသိမများကြသဖြင့် သဒ္ဓါတရားလည်း မတိုး, သာသနာတော်ဆိုင်ရာ
သမထ ၀ိပဿနာ ပညာလည်း မတိုး, စိတ်နေစိတ်ထား ကြီးမားရင့်သန်မှုလည်း မတိုးပွားဘဲ ထိုဘေးများဝယ်
တ၀ဲလည်လည် ဖြစ်နေကြရပြီ မဟုတ်ပါလော။
No comments:
Post a Comment