အနာဂတ်သာသနာရေး အပိုင်း(၇၅) ရုပ်အဆင်းကွဲပြားပုံနှင့် စိတ်ချင်းကွဲပြားပုံ

ရုပ်အဆင်းကွဲပြားမှု    

ရှေးရှေးဘ၀၌  ပြုအပ်သော  ကံသင်္ခါရကြောင့်  ယခုဘ၀၀ယ်  စိတ်ဝိညာဉ် စေတသိက်နာမ်နှင့် ကံကြောင့်ဖြစ်သော ရုပ်တရားတို့ ပဋိသန္ဓေ တည်စ ပထမအချိန်မှ အစပြု၍ ဖြစ်ကြရသည်ဟု ဗုဒ္ဓရှင်တော် မိန့်တော်မူသည့်အတိုင်း ယခုကာလ၌ ရုပ်အဆင်းချင်း မတူကြပုံကို ကိုယ်တိုင်ဒိဋ္ဌ မြင်နေကြရပေပြီ၊ သို့သော် ထပ်၍ ရှင်းပြဦးအံ့… ပဋိသန္ဓေ တည်စ၀ယ် ရှေးကံသင်္ခါရကြောင့် ရုပ်မှုန့်ကလေး ဖြစ်သည်မှ စ၍ တစ်စ တစ်စ ကြီးထွားလာရာ၌ အမိအဖတို့၏ သုက်သွေးသည် ထိုရုပ်မှုန့်ကလေးအား အငွေ့ဓာတ် (တေဇော-ဥတု) ပေးလျက် ရှိ၏။

          ထို့ကြောင့် မြေနီတွင်းအောင်း ဖွတ်သတ္တ၀ါသည် “ဖွတ်နီ”ဖြစ်၍ မြေနက်တွင်းအောင်း ဖွတ်သတ္တ၀ါသည် “ဖွတ်နက်”ဖြစ်ရသကဲ့သို့ ထို့အတူ မိဘတို့၏ သုက်သွေးကို လိုက်၍ ရုပ်ဖြူ ရုပ်ဝါ ရုပ်မည်းများ ဖြစ်လာရုံသာမက  မိဘတို့နှင့်  ပုံသဏ္ဌာန်လည်း  အတော်အတန် တူလာကြပေသည်၊ ထိုသို့ ဖြစ်ရာ၌ အမြွှာမွေး ညီနောင်နှစ်ယောက် ၏ ရုပ်အဆင်း ပုံသဏ္ဌာန်ကို သေချာစွာ ကြည့်သောအခါ … တူသယောင်ယောင် ရှိနေသော်လည်း တစ်ထပ်တည်းကား မတူ နိုင်ပုံ, အဖြူ အမည်း ကွဲပြားပုံ, လက် ခြေ အနေအထား ကွဲပြားပုံ, အနိမ့် အမြင့် ကွဲပြားပုံကို တွေ့ရ၏။

          “ဘာ့ကြောင့် ထိုသို့ ကွဲပြားရသနည်း၊  မိဘ သုက်သွေးနှင့် မိခင်၏ အစာသည် တစ်ခုတည်းပင် မဟုတ်ပါလော”ဟု စဉ်းစား သောအခါ ရှေးရှေးဘ၀ ကံသင်္ခါရ ပြုတုန်းက တစ်ယောက်နှင့် တစ်ယောက် မတူခဲ့သဖြင့် ထိုကံကြောင့် ဖြစ်ရသော ပဋိသန္ဓေ ရုပ်မှုန့်ကလေးများကို စီစဉ်ပုံလည်း တစ်ယောက်နှင့်တစ်ယောက် မတူကြပေ၊ ထိုအရင်းခံ  ရုပ်မှုန့်မျိုးစေ့၏  မတူခြင်းကြောင့် ကြီးထွား လာသောအခါ၌လည်း တစ်ယောက်နှင့်တစ်ယောက် တစ်ထပ်တည်း မတူနိုင်ဘဲ ရှိရသည်ဟု ထင်ရှားပါတော့သည်၊  ထို့ကြောင့် ကံချင်း ကွဲပြား၍ ဖြစ်ကြရသော သတ္တ၀ါအမျိုးမျိုးတို့၌ ပုံသဏ္ဌာန်အမျိုးမျိုး တို့ ရှိ၍ အဆင်း လှသူ, မလှသူ စသည်ဖြင့် အမျိုးမျိုး ရှိကြသည်ဟု မှတ်ပါ။

          ဤနေရာဝယ် အမိဝမ်းတွင်းမှ စ၍ မိခင်၏ အစောင့်အရှောက် ကောင်းမှု, လက်သည်ဆရာမတို့ အစောင့်အရှောက်ကောင်းမှု ကြောင့် ကျန်းမာသန်စွမ်း၍ ရုပ်အဆင်း လှပစေနိုင်ကြောင်းကို မငြင်းပါ၊ ထိုသို့ မိခင် စသူတို့က စောင့်ရှောက်၍ လှပသောရုပ် အဆင်းသည် ပြခဲ့သော  ရုပ်လေးမျိုးတွင်   ဥတုဇ,  အာဟာရဇ နှစ်မျိုးသာ ဖြစ်၏၊ ထိုနှစ်မျိုးက မူလကမ္မဇရုပ်ကို ထောက်ပံ့ခြင်းကြောင့် မူလကမ္မဇရုပ်လည်း ကြည်လင် သန့်ရှင်းရခြင်းဖြစ်သည်၊ အကယ်၍ စိတ်ကိုပါ ချမ်းသာအောင် စောင့်ရှောက်နိုင်ပါမူ စိတ္တဇရုပ်လည်း ကြည်လင်သန့်ရှင်းကာ တစ်ကိုယ်လုံး လှပအောင် ထောက်ပံ့နိုင်ပါ၏၊

သို့သော် ဤသို့ အပြုအပြင် အကောင်းဆုံး ဖြစ်နေသူ နှစ်ယောက်ကို (အပြုအပြင်ကောင်း သော အမြွှာမွေး နှစ်ယောက်ကို) နှိုင်းယှဉ် ကြည့်ပြန်လျှင် သူတို့ချင်း လှ, မလှ ကွဲပြားကြဦး မည်သာ၊ ထိုသို့ ကွဲပြားပြန်သဖြင့် “အရင်းစစ်လျှင် အမြစ်မြေမှာ”ဆိုသကဲ့သို့ ရှေးကံ သင်္ခါရအပေါ်၌ သတ္တုကျမည်သာ၊ သို့ဖြစ်၍ ရှေးကံ သင်္ခါရ မတူမှုကြောင့် ရုပ်အဆင်း မတူကြပုံမှာ ယုံကြည်လေးစားသင့်လှပါသည်။

စိတ်ချင်းကွဲပြားပုံ

ရှေးကံသင်္ခါရကြောင့် ရုပ်ချင်းသာ ကွဲပြားကြသည် မဟုတ်၊ စိတ်ချင်းလည်း ကွဲပြားသေး၏၊၊ ချဲ့ဦးအံ့… ယခုကာလ တစ်မိဘတည်း တစ်ဆရာတည်းဖြစ်သော ညီနောင်တို့သည်ပင် စိတ်ရင်း စေတနာရင်းမှာ အကောင်း အဆိုး ကွဲပြားကြသည်ကို တွေ့ရ၏၊ နည်းနည်းပါးပါး ကွဲပြားနေသည် မဟုတ်၊ တစ်ယောက်သည် လူလိမ္မာ, တစ်ယောက်သည် လူမိုက် ဖြစ်ရသည့်တိုင်အောင်ပင် ကွဲပြားကြသေး၏၊ [အပေါင်းအသင်း မကောင်းခြင်း စသည်ကြောင့် ကွဲပြားကြရာ၌လည်း သူတို့၏ စိတ်ရင်းလိုက်၍ တစ်ယောက်သည် ပျက်စီး၏၊ တစ်ယောက်သည် မပျက်စီး၊]

စိတ်ရင်း (ပဋိသန္ဓေ၀ိညာဉ်) ကောင်းသူသည် အရာရာ စိတ်ကောင်း၍ အပေါင်းအသင်းကြောင့်လည်း မပျက်စီးနိုင်၊ ထို သူမျိုးသည် (ပဋိသန္ဓေ၀ိညာဉ်ကို နာမည်တပ်၍) “တယ်… ဉာဉ်ကောင်းတဲ့ ကလေး = အလွန် သန္ဓေကောင်းတဲ့ ကလေး” စသည်ဖြင့် ကလေးဘ၀ကပင် အချီးမွမ်းခံရ၏၊ စိတ်ရင်း ညံ့သူ ဆိုးယုတ်သူကား သူ့ဘာသာလည်း မကောင်း, အပေါင်းအသင်း ကြောင့်လည်း ပျက်စီးတတ်၏၊ သူလုပ်သမျှ အရာရာ မကောင်းတွေ များလှ၏၊ ထိုသူမျိုးသည် “တယ်ဉာဉ်ဆိုးတဲ့ အကောင်ပဲ=သန္ဓေဆိုး ကလေးပဲ”ဟု ကလေးဘ၀ကပင် အပြောခံရလေသည်၊ ထိုသို့ ဆိုးတေရာ၌ ပြင်၍ ရအောင် ဆိုးသူလည်း ရှိ၏၊ ထိုသူမျိုးကား အပြင်ကောင်းသူနှင့်တွေ့လျှင် လူကောင်းသူကောင်း ဖြစ်နိုင်သေး၏၊ ပြင်၍ မရအောင် ဆိုးသူလည်း ရှိ၏၊ ထိုသူမျိုးကား ပြုပြင်ပေးသော် လည်း သန္ဓေစိတ်ရင်းက ညံ့ဖျင်းခဲ့သောကြောင့် “ခွေးမြီးကောက် ကျည်တောက်စွပ်ပေးခြင်းပင်” ဖြစ်လိမ့်မည်။

          မှန်၏၊ ခွေးပဋိသန္ဓေကို ရသဖြင့် ခွေးဘ၀ရောက်နေသော ခွေးကို ရာဇပလ္လင်ပေါ်တင်၍ ဘုရင်မြှောက်ကာ ခမ်းနားသော ပွဲတော်စာကို အ၀ကျွေးထားသော်လည်း ဖိနပ်စုပ်ကလေး မြင်လျှင် စားချင်နေဦးမည်သာ၊ ၀နေ၍ မစားနိုင်ပါမူ နမ်းကြည့်ရဦးမှ စိတ်ကျေနပ်ရှာပေလိမ့်မည်၊ ဤသို့လျှင် ရှေးကံသင်္ခါရကြောင့် ပဋိသန္ဓေ တည်ခါစ၌ ပထမဆုံးဖြစ်သော ၀ိညာဉ် နာမ် ရုပ်တို့သည် တစ်ဘ၀ လုံးအတွက် အကောင်း အဆိုး ကွဲပြားဖို့ရန် အခြေခံမျိုးစေ့ ဖြစ်ကြရကား ယခုလို အသိဉာဏ်ရှိသော ဘ၀၀ယ် (ကိုယ်မှု နှုတ်မှု စိတ်မှု) သင်္ခါရဟူသမျှ အကောင်းဆုံးဖြစ်အောင် ပြုပြင်သင့်ကြပေသည်။

 

Credit to

တင်ပြသူ Yanan Sanein အချိန် 6:30 AM